ГЪУДГАН
Дюаь
Ккарагури,
Дюаь вуйиз:
«Я, Сар Аллагь!
Рягьим, рягьмат
Гьаъ аьршдиан
Йиз хизандиз,
Дюз рякъюъди
Гъягъюз гьарган,
Вахтниинди
АпIуз гъудган,
Улдудугди,
Вафалуди
Увуз, Худа!
Амин! Амин!
Тафикь тува,
Я Сар Аллагь!
Читин йигъар
Улуркьиган,
Кьаза-бала,
Уьзур гъиган,
Умуд кади,
Аман ади,
Икрам апIуз
Увуз, Худа!
Тафикь тува,
Я Сар Аллагь!
Ккарагури
Увуз, Агъа,
Гъудган дапIну,
Дюаь убхуз.
Сагъ-саламат
Узу уьрхюз,
Аьршдиан гьапI
Дава-дарман.
Амин! Амин!
Я Сар Аллагь!
Сабур тува,
Аьгь апIувал
Ив юкIвариъ,
Тувубдиин
Вуди рази,
Ахиратдиъ
Шлуси мягьсул,
Мюгькам апIин
Му ич иман,
Фана дюнья
Фана хьайиз
Кьур`ан урхуз,
Гъудган апIуз
Вахтниинди,
Марццшин ади,
ТIагъру дарди,
Вафалуди.
Амин! Амин!
Ухьуз кIура
АьрштIан гьау
Каламарик
Ухьуз кIура:
«… Адамдин бай,
Фикрар яв гъит,
Аьрзар мапIан,
Гуж мутуван,
Я харж мапIан.
Вари тувна
АьрштIан увуз,
Ризкьра, шидра
Сар Аллагьди.
Вахт улубкьган,
Гъудган апIин,
ШейтIнин васвас
Ярхла дапIну.
Жилгъа шулвуз
Женет багъдиз,
Бахтлу шулва
Му дюньяйиъ.
Йихь аманат
Сар Аллагьдиз,
Умуд кади,
Вафалуди.
Сар Аллагьди
Ухьуз кIура:
«…Узуз учву
Ккундиз гизаф,
Думукьан ичв
Фикриъ убшдар…»
Вари тувна
АьрштIан ухьуз.
Гьюрмат ади,
Вафалуди
Икрам апIин
Марцци кIваан
Вахтниинди.
Вахтниинди
Гъудган апIин.
Фарз ву гъудган,
Бурж ву гъудган,
Нур ву гъудган.
Аьлакьара
Аллагьдихъди.
Эгер гъудган
Вахтниинди
Тамам гъапIиш,
Рягьим, рягьмат
Шулу аьрштIан.
Завун мурхьул
Вухьуз гъудган.
Кьаза
Жил`ин уьмур
Ву гъазамат,
Аьгъю апIин,
Адамдин бай.
Эгер хьундарш
Вахтниинди
Гъудган апIуз,
Гьяркат апIин
Кьаза хъапIуз,
Шулу дарман
Ахиратдин
Думу увуз.
Гъит яв рюгьназ
Ниъ дарифри
Жегьеннемдин.
Жил`ин уьмур
КкудубкIиган,
Кафнарин кьикь
ХъючIюбкьиган,
КIару ругдик
Фаркьат гъапIган,
Сагъун шулу
Вари аьмлар.
Дивандин йигъ
Улубкьиган,
Кьимат дивру
Яв кьазйириз.
Рягьим апIри
Сар Аллагьди!
Амин! Амин!
Ачар
Гъудгнин ачар
Ву марццишин
Яв бедендин
Сагъламвалин
Ва палатдин.
Дугъри кIуруш,
Къанун, къайда
А палтарин
Дишагьлйирин
Ва жиларин.
Гьарсаб гъуднин
А вахт-сяаьт
Улупнайиб
Ухьуз аьрштIан.
Кьан дарапIди
АпIин гъудган,
Урнар арццуз
Вуз женнетдиз,
Адамдин бай.
ИншаАллагь!
Гъудгнар
Гъудгнар апIуз
Мугъаят йихь,
ТIагъру мапIан,
Кьагьал машан,
Аьмлар яв гъит,
Адамдин бай.
Ашкар шулу
Дурар вардиз,
Дивандин йигъ
Улубкьиган,
Аьрасатдин
Майдандиин.
Шюкюр ибшри
Сар Аллагьдиз!
Улупна вахт
Ва рякатар:
Сюгьрин гъудгнин
Ву кьюб рякат;
Хъа лисундин –
Юкьуб рякат;
Аркбандинра –
Юкьуб рякат;
Лавландин ву
Шубуб рякат;
Юкьуб рякат
Ву хътIирхбандин.
СюбгьянАллагь!
Тафикь туври
Сар Аллагьди
Тамам апIуз
Гьарсаб гъудган
Вахтниинди,
Марццшин ади,
Улдудугди,
Вафалуди,
Дикъатлуди.
Амин! Амин!
Кьибла
Дикъатлуди
Тамам апIин
Гъудган апIбан
Гьюкум-къайда.
ИлтIикI кьибла
Терефназди,
Мекка шагьриъ
ДапIна тикмиш
Гирами Хал
Сар Аллагьдин.
Аллагьу акбар!
Аллагьу акбар!
Аллагьу акбар!
Гъи
Гъи, гъилигиш
Аьгьвалатдиз,
Гьарсаб гъулаъ,
Гьарсаб шагьриъ
Тикмиш дапIну
Ахьуз мистар.
ИлтIикIну а
Кяба тереф,
Ибадатназ
«Буюр!» кIура.
Гьяйиф, гьяйиф,
Хъана гьяйиф,
Гъи ихь иман,
Гъубгъиганси
Лап аьхю йиф,
Дубхьна мичIал.
Хъа иблисдик
ЦIа ка яман,
Магьа учвуз
Аьмал дидин:
Ният саб ву,
Васвас – жараб.
Аьгъювалар,
Аннамиш`вал
Ву лап зяйиф.
Вари тувна
Сар Аллагьди.
Фу ккундувуз,
Адамдин бай???
ТIалаб
Заан тIалаб
Ислам диндин
Вухьуз гъудган.
Фарзди тувна.
Гъудгнин жикIну
Ккунду гьарган:
Гъафил шулу
Уьмриъ инсан,
ЮкIв хъабхри аш,
БатIил шулу
Му яв гъудган.
ТIагъру мапIан,
Гъудгнин жикIбан
А ужара,
Аьхю саваб,
Адамдин бай.
Шагьадатнан
Келима йип
Ва дюаь убх,
Адамдин бай.
Аллагьу акбар!
Аллагьу акбар!
Аллагьу акбар!
