Аьхю савабар туври…
19-пи сентябриъ Табасаран райондин Ахьитl гъулаъ мист ачмиш апlбан серенжем кlули гъубшну. Му мист тикмиш апlбаз фу себеб гъабхьнуш, дишлади мялумат тувуз ккундузуз. Ахьитl гъулан Мягьяммадрасул кlуру сар агьали читин уьзриан 30 йис яшнаъ ади кечмиш гъахьну. Учв кечмиш хьайиз дугъу чан хизанариз гьаму фулану йишвахь мист дивуз ният вуйиз, эгер узхьан дархьиш, му ляхин кlулиз адабгъайчва, кlури гъапнийи.
Магьа му кас кечмиш хьпан кьяляхъ дугъан хизанари дугъланмина гъубзу васият тамам гъапlну. Фукьан вушра уткан мист ккабалгну. Думутlанна гъайри, мистра саб гюрчег майдниин, рякъюъ айидариз гъудган апlуз гизаф рягьти йишвахь тикмиш гъапlну.
Уч духьнайидарин улихь улхури, Мягьяммадрасулин адашди варидариз чухсагъул къайд гъапlну.
«Гъи ухьу вари гьаму ужувлан ляхниз уч духьнахьа. Йиз балин ният кlулиз адабгъну, магьа шаду серенжемдиъ ахьа. Му ляхниъ иштирак гъахьидариз, багахьлуйириз ва мирасариз кlваантlан чухсагъул кlураза», - гъапну Кьудрат Агъасиевди.
Уч духьнайидарин улихь гьацира Ахьитl советдин глава Рустам Шихмягьяммадов, Сефер Алиев, багахь гъуларин имамар иштирак гъахьну.
Мажлис кlули гъабхурайир Ахьитl гъулан имам Аьгьмадпаша Гьяжиев вуйи.
Дугъу чан терефнаан мист тикмиш гъапlдариз ва мажлиснаъ иштирак шулайидариз чухсагъул гъапну ва гъул-жямяаьтдиз гьарган кюмек апlурайи меценатаризра баркаллагь гъапну.
Уч духьнайидарин улихь удучlвну улхури, Табасаран райондин имам Ансар Рамазановди мистар тикмиш апlбан савабнакан ва лайикьлуваликан ктибтну.
«Гьюрматлу ватанагьлийир! Мист апlбииндин му ксари чпиз Аьхират ккабалгура. Ав, жвув му жилиин илмиди велед фаракьат апlувал абизна-бабаз гизаф читин ва дерднан ляхин ву. Гъит му хизандиз сабур туври. Хъа му мист Мягьяммадрасулин ччвурнахъ дапlнайиб ву. Гъит Аллагьу Тааьлайи чан гунгьарин аьфв апlри, дугъаз женнет кьисмат апlри», - гъапну райондин имамди.
Мажлисдин аьхириъ гъуллан гъушу вари ксарихъан «Мулк» сура ва зикир дурхну, дурарин рюгьяриз бахш гъапlну.
Гъит Аллагьу Тааьлайи му ксарин гъизигу зегьмет кьабул апlри, гъит му гъул-жямяаьтдиъ гьарган анжагъ ужувлан ва шаду серенжемар ишри.
Ильяс Омаров
