Гьесихъ гъулаъ цlийи мист ачмиш гъапlну
Гьесихъ гъулаъ цlийи мист ачмиш гъапlну
Гьесихъ гъул Табасаран райондиъ аьлимариинди машгьур вуйи гъуларикан саб ву. Улихь вахтари му гъулаз Сирияйиан вуйи Сеййидар гъафну ва гьадрариланмина Ислам диндин яркьувалар арайиз гъафну. Гьадму вахтарихъанмина мушваз шихарин, маллйирин гъул кlури гъахьну.
Думу аьлимарин берекет ва дурари гъизигу зегьметну гъийин йигъанра бегьер тувра.
Магьа 14-пи октябриъ Табасаран райондин Гьесихъ гъулаъ цlийи мист ачмиш апlбаз бахш дапIнайи аьхю серенжем кlули гъубшну.
Мажлисназ жюрбежюр йишвариан инсанар уч духьнайи.
Мажлис гирами Каламдиан аятар урхбиинди ачмиш гъапlну.
Гьесихъ гъулан имам Шихмягьямад Аьбдуллаевди чан ва жямяаьтдин терефнаан вари дуфнайи хялариз му гирами мажлиснаъ иштирак хьпан аьхю чухсагъул гъапну. Гьацира имамди жямяаьтдиканра гьамци гъапну: «Гьюрматлу жямаьтар! Сабпи нубатнаан учвуз аьхю чухсагъул. Магьа гъи ихь цlийи мист ачмиш апlурахьа. Му ухьу вари сатlиди жалб духьну тикмиш гъапlу мист ву. Гьаму дарамат тикмиш апlури гьич саб гъапlу ляхнихъанкьан пул тувуб герек гъабхьундар, вари ихь жямяаьтдин хилариинди, пулсузди гъапlунхьа. Гъит Аллагьу Тааьлайи ухьу гьарсари туву садакьйир, гъапlу ужувлан ляхнар кьабул апlри, гъит гьарсаб хизандиъ берекет, шадвал ва бахтар ишри».
Имбу мажлис кlули гъабхуз Табасаран райондин дяъват отделин регьбер Аьгьмад Сеферовдиз гаф тувнийи.
«Магьа Гьесихъ гъулаъ Аллагьу Тааьла рази шлу, заан къайдайин мажлис кlули гъябгъюра. Мицдар шаду ляхнар арайиз хури, ухькан гьарсари жвуваз ахиратдиз ужувлар гьязур апlурахьа. Аьхю вуйи чухсагъул гъулан имам Шихмягьямад халуйиз. Му касди жямаьтдин улихь гьучlвну гирами мист вахтниинди ачмиш апlуз гизаф зегьмет гъизигну. Гъит Аллагьу Тааьла му мистаъ гафниинди, дакьатариинди иштирак гъахьи вари инсанарикан рази ишри», - гъапну Аьгьмад Сеферовди.
Жулжагъ гъулан советдин регьбер Шагьимердан Гьясанаваевди чан улхбаъ варидариз чухсагъул гъапну. «Гъи багъри жилариин ужуб серенжем гъябгъюра, цlийи мист ачмиш апlура. Баракаллагь гъулан имам Шихмягьямаддиз ва дугъаз кюмек гъапlдариз. Магьа му гъулаз ужуб рякъ дубхьна, уткан мист дубхьна, вари му ляхнариъ иштирак гъахьидариз кlваантlан чухсагъул кlураза», - гъапну Шагьимердан Гьясанаваевди.
Мажлиснаъ уч духьнайи аьлимари Ислам диндиан жюрбежюр мялумат тувну.
Огни шагьрин Жвуми мистан имам Мугьяммадрамазан Ражабовди веледариз ужуб тербия тувну ккуниваликан, чиб-чпихьна гьюрмат дубхьну ккуниваликан яркьуди ктибтну.
Дербент шагьрин Мугьяммад Ярагъийин ччвурнахъ хъайи мистан имам Мугьяммадтlагьар Аьгьмадовди чан улхбаъ Пайгъамбарин ﷺ уьмрикан, дугъан асгьябарикан ва, фици мусурмнари думу рякъ дибисну ккундуш, гьаддикан ктибтну.
Аьлимари гьацира абйир-бабарин гъайгъушнаъ духьну ккунивалин, яшлуйирихьна гьюрмат ва бицlидарихьна рягьимлувал дубхьну ккунивалин гьякьнаанра ктибтну.
Сиртыч гъулан имам Аьбдурашид Шихбабаевди уч духьнайидариз жямяаьт гъудгнин фазилатваликан, дидин заанваликан, мистар жямяаьтар уч хьпиинди ккабалгуваликан мялумат тувну.
Гьепlил гъулан имам Аьбдулла Аьлиевди гъи диндикан мялумат туврайи «Ас-салам» газатдин гьякьнаан, дидиз подписка апlбакан айи хайир фициб вуш ва дидланмина фукьадар инсанари мяна ктабгънуш яркьуди ктибтну.
Аьлимарин вязйирин арайиъ нашидар-мавлидар гъурхну.
Мажлиснан аьхириъ Табасаран райондин имамарин советдин председатель Ансар рамазановдиз гаф тувнийи.
«Гьюрматлу имамар, аьлимар ва Гьсеихъ гъулан жямяаьт. Гъит Аллагьу Тааьла мист бадали учву гъизигу зегьмет заан дережайиинди ахиратдиъ рубкьручвуз. Дугъриданна гъулан имам Шихмягьмед халу улихь гьучlвну, дугъахъди вари ичв гъулан жямяаьтди гизаф зегьмет гъизигну. Аллагьу Тааьлайи му гъул-жямяаьтдиз ва вари ихь мусурмнариз ужувлар, бахтар, хъуркьувалар ва ислягьвал туври. Гьесихъ гъул Табасарандиъ аьлимар-шихар гъахьи гъулси мялум ву. Ислам дин бадали мушваъ аьхю гьядисйирра гъахьну. Ихь аьхю абйири ислам диндин пайдагъ за апlбан бадали гизаф зегьмет гъизигну ва заан дережайиинди ухьухьна гъурубкьну. Магьа гьамус му ляхин ухь’ина дуфна ва ухьу му ляхин ихь насларихьна фици рубкьуруш, ари гьадилланра гизаф асиллу ву. Гьаци вуйиган, гъачай ихь Ислам диндикан мялумат гъадабгъухьа, илим дубгъухьа, аьгъдрум ахтармиш апlухьа. Гьаци гъабхьиш Аллагьу Тааьлара рази шул ва ахиратра ужуб шул», - къайд гъапlну райондин имамди.
Гъит Аллагьу Тааьла варидарикан рази ишри, гъит хъуркьувалар ва ужувлар артухъ ишри. Му мист инсанарихъди абцlуз кюмек туври! Амин!
