Закир Идрисов – жигьил аьлим

Закир Идрисов – жигьил аьлим

Аьхиримжи вахтари Ислам диндин вузариъ урхурайи Табасаран райондин агьалйири лап заан хъуркьувалар улупура. Му ляхниин гьарсар кас лап шад духьну ккунду.

Сакьюдар йисар мидиз улихьна ухьу му газатдин машариъ Табасаран райондин Гьарихъ гъулан агьали Мугьяммад-Амир Мевлютов Ислам диндин илмарин доктор хьуваликан мялумат тувнийхьа.

Дугъан кьяляхъ Акъа гъулан агьали Рашид Аьлимурадовра диндин илмарин доктор гъахьну.

Гьамус магьа Гьарихъ гъулан агьали, Дагъустандин диндин университетдиъ 7-пи курснаъ урхурайи Закир Идрисовди Вариурусиятдин жигьил аьлимарин конкурсдиъ сабпи йишв гъадабгъну.

Му ихь халкьдиз нубатнан ражари лап шадлу хабар ву.

Вари йишвариан заан аьгъювалар айи жигьил аьлимар иштирак шулайи талитнаъ сабпи йишваз лайикьлу хьували Закирин диндин аьгъювалари заан дережа улупура.

Фикир тувай: Гьарихъ гъул Табасаран райондин бицlи гъуларикан саб ву. Гьаму бицlи гъул’ан магьа кьюр аьлим удучlна – сар диндин илмарин доктор, тмунурсана жигьил аьлимарин конкурсдиъ гъалиб гъахьир.

Сабпи нубатнаан ихь райондиъ мицдар баяр тербияламиш апIбан аьхю чухсагъул абйир-бабариз кlурахьа. Дурари гьамциб тербия ва заан аьгъювалар тувнайи чпин велед, жара йишвар гъитну, диндин университетдиз гьауб аьхю вуйи баркаллу ляхин ву.

Кьюбпи нубатнаан мурарин мялимариз аьхю вуйи чухсагъул. Йигъ-йишв дарпиди гьаму ихь баярихъ зегьмет зигури, дурар гьамциб дережайихъна гъахну.

Хъа мураризтlан аьхю чухсагъул ихь Дагъустандин муфтий шейх Аьгьмад афандийиз. Гьаз гъапиш ихь веледариз диндин аьгъювалариз гъадагъуз мумкинвал тувуз медресйир, институтар арццур гьаму кас ву. Диндин тялимар хьпан бадали, ухьуз имамар-аьлимар хьпан бадали му касди гизаф зегьмет гъизигну. Ич баяриз илим урхуз мумкинвал тувбан, ич баяр гьамциб дережайиз за апlуз кюмек тувбан аьхю чухсагъул увуз, Аьгьмад афанди!

Закир иштирак гъахьи конкурс кьюб этапдинуб вуйи. Кьюбиб этапариъра Закири заан хъуркьувалар улупну.

Магьа вари му конкурсдин натижа адабгъуз «Россия – моя история» кlуру зализ уч гъахьну.

Му серенжем гирами аятар урхбиинди ачмиш гъапlну.

Мажлиснаъ Дагъустандин муфтий шейх Аьгьмад афанди, диндин ва жямяаьтлугъдин ляхнарин министр Энрик Муслимов ва аьраб гьюкуматариан дуфнайи адлу аьлимар иштирак гъахьну.

Мушваъ аьлимари илим урхбакан ва дидин заанваликан яркьуди ктибтну.

Магьа натижа адабгъру вахт улубкьу. Сабпи миржиб йишваз лайикь гъахьидариз пешкешар тувну.

Дурарикан варитlан заан аьгъювалар улупу Закир Идрисовдиз пешкеш вуди цlийи машин тувну.

Магьа гьамци табасаран халкьдин арайиъ жигьил аьлим арайиз гъафну.

Хъа му макьалайиъ Закирин абйир-бабарикан дарпиди гъузуз шулдар. Закирин адаш Камил Идрисов Гьарихъ гъулан имам ву. Дугъан имамвалин вазифйир гъахури 20 йистlан артухъ ву. Чав лихури гъахьи вахтна гъул-жямяаьтдин арайиъ чаан удукьруси зегьмет зигури, жвувхьан шлубдин кюмек апlури янашмиш шула. Райондиъ шулайи фуну-вушра диндин ляхниъ Камил Идрисов улихь шула. Ав, гьамцдар абйир-бабарихъ гьамцир лайикьлу байра шул.

Идрисоварин хизандиз му лап заан хъуркьувал ву. Закири школайиъ урхурайи вахтнара заан хъуркьувалар улупну. Чан илмиин юкlв аливалиан, жвуву гъизигу зегьметнаан Аллагьу Тааьлайи гьамциб натижара тувну.

Гъит Аллагьу Тааьлайи Закириз хъанара аьхю хъуркьувалар туври ва ихь халкьдиз дугъкан аьхю мянфяаьт ибшри.

Закирин адаши гъапну: «Гьаму велед бабкан гъахьихъанмина гьар ражари ихь аьлимар рякъруган, йиз байра аьлим духьну ккунийи кlури, ккарагури шуйза». Магьа Камил халуйин дюаь Аллагьу Тааьлайи кьабул гъапlну.

Гъит Закир чаз айи аьгъюваларихъди гъягъру аьлимарикан ишри.

Вари табасаранлуйир ихь жигьил аьлим гъалиб хьувалихъди кlваантlан тебрик апlураза.

Гъит ихь имбу тялимаризра гьамцдар хъуркьувалар ишри.

Ансар Рамазанов