Йисандин натижйир

Ассаламу аьлайкум! Жвуву апlурайи ляхниъ саб натижа гъабхьиган, кIвазра рягьят шулу, лихузра аьшкь гъюру. Жвуву фу ляхин гъапlнуш, фунубсана ляхин дапlну ккунш ва фтиз фикир тувну ккундуш лигури гъахьиш, гьадмукьан ляхнин мянара, марццивалра заануб шул.

Табасаран райондиъ гьар цlийи йисан эвелиъ ктабхъу йисандин арайиъ гъабхури гъахьи ляхнин натижйир йивури шулу.

Магьа гьаму йисанра январин эвелиъ ккудубшу 2025-пи йисандин натижйир адаъну.

Хючна гъулаъ айи клубдиъ имамар, аьлимар ва аьдати халкь уч гъахьну. Уч духьнайидарин улихь удучIвну улхури, Табасаран райондин имамарин Советдин председатель Ансар Рамазановди йисандин арайиъ имамарин, дяват отделин гъуллугъчйирин, «Инсан» фонддин ва «Ассалам» газатдин гьякьнаан мялумат тувну.

Дупну ккундуки, улхьан йисантlан магьа цци хъана ужудар натижйир гъахьну.

«Гьямд ибшри Аллагьдиз, магьа йислан-йисаз ляхнин ери за шула, ухьу ляхин гъабхурайи гьарсаб цирклин хъуркьувалар саб дережакьан за духьна. Гьамдихъди сабси диндин ляхниъ зегьмет зигурайидариз варидариз аьхю чухсагъул кlураза», - гъапну райондин имамди.

Дагъустандин Муфтиятдин Кьибла терефнаъ айи полпред Мугьяммад-Рамазан Ражабовдира Табасаран райондиъ диндин улихь гьучlвну ляхин гъабхурайидариз чан терефнаан чухсагъул мялум гъапlну.

Уч духьнайидарин улихь гьацира диндин илмарин доктор Мугьяммадамир Мевлютов, Хив райондин имам Шябан Салихов, Дербент райондин имам Мугьяммадтlагьир Аьгьмадов ва гьацира жарадар удучIну гъулхну.

Аьлимарин вязйирин арайиъ Заур Салиховди чан уткан сесниинди мавлидар-назмар гъурхну.

Райондин имамди чан терефнаан ужудар натижйир улупу ксариз пешкещар гьязур дапlнайи.

Сарпир вуди хилихъ хъапlру сяаьт ва Афериндин кагъаз Гурхун гъулан имам Гьясан халуйиз тувну.

Гьациб пешкеш хъанара Гуми гъулан имам Низами Шябановдиз ва Ерси гъулан имам Ниязуддин халуйизра тувну.

Дишагьлийирин дяъват отделин гъуллугъчи Фатима Аьлиевайиз Уьмрайиз путёвка тувну.

Ихь гьаму газатдин литературный редактор, корректор, РАН-дин ДФИЦ-дин чlаларин, литературайин ва искусствойин институтдин илимдин гъуллугъчи Шарафудин Закиевичдизра Уьмрайиз путёвка тувну.

Дупну ккундуки, Шарафудин Закиевичди му ихь газатдиъ 2010-пи йисхъанмина ляхин апlура. Думутlанна гъайри учв лихурайи жара йишвариъра дугъу ихь халкьдиз аьхю мянфяаьт хура.

Гъит Аллагьу Тааьлайи варидариз кюмек туври, варидариз ужувлар, бахтар ишри. Гьаму улубкьнайи цlийи йисанра ухьуз хъанара ужуди ляхин гъабхуз кюмек туври!