Суал-жаваб
Ккурттарик деебццнайи ифи кади гъудган гъапlиш кам шуйин?
Имам Шафиийин мазгьабдиинди ифи гъеебццуб вуш - дарш фаркьвал адар, гъудган кам шулдар.
Йиз жигьил вахтна жвуван аьгъдрувалиан узуз сигьру гъапlунза. Гьамус гизаф швумалди вуза, ва Ислам диндиъ улупнайи къайдайиинди алдабгъуз ккундузуз. Фу дапlну ккунду?
Жвуваз вушра, жара касдиз вушра, сигьру апlуз хай шулдар, гьярам ляхнарикан ву. Хъа уву му ляхнин чlурувалин гъаври хьувал ужи ву. Гизафси гирами Калам урх, эгер урхуз аьгъдарш, хъпехъури йихь. Хъа сигьру алдабгъуз гирами Калам урхури алдабгъру касдихьна илтlикlубра герек ву.
Ич магазин айич. Магазиндин багхьантина гъягърудари арагъи, ясана папрус айин, кlури гьерхри шулу. Ич магазиндиъ гьярам вуйиб адар, амма гьаци узхьан гьерхган, фулани магазиндиъ масу тувра кlури, улупури шулза. Гьаддикан узуз гунагь айин?
Эгер дурар уву улупу магазиндиз душну, гьярам вуйиб гъадабгъну убхъури гъахьиш, увузра гьадраризсиб гунагь а. Уву му гунагьнан иштиракчи шулава. Увхьан арагъи айин кlури гьерхган, «ваъ» йип ва наан туврашра улупуб герек адар. Думутlанна гъайри, эгер магазиндин сабуну йишвак «Вари пиян апlруб гьярам ву» кlуру гьядис гъибикIнийиш, хъанара ужи хьибди.
Дишагьлийиз пеъ, якъ убккуз ихтияр айин?
Дишагьлийиз пеъ, якъ убккуз хай шулу, эгер убккбан шартlар тамам апlуруш.
Узу швувахь хьайир вуза, амма учу никягь апlруган, йиз жилир хъади гъахьундар, дугъан адаш ва аба иштирак гъахьну. Гьамциб никягь гьякьлуб вуйин?
Жилирихьан, чан никягь апlруган, жара касдиз вакилвал тувуз шулу. Дугъу чахъанди никягь апlуз иштирак хьуз жвуван адашиз, абайиз вакилвал тувнушул. Думу дюшюшдиъ никягь гьякьлуб шула.
Гирами Каламдиъ фуну мистар кlваин дапlна?
Гирами Каламдиъ 5 мист кудухна:
- Меккайиъ айи Гьярам мист
- Мединайиъ айи Ан-Набави мист
- Зирар мист
- Акьса мист
- Кьуба мист.
Медина шагьрин жара ччвур фициб ву?
Думу шагьриз Ясриб кlури гъахьну.
Гирами Каламдиз асас духьну, варитlан аьхю гунагь фу ву?
Инсан мусурманвалиан удучlвуб - куфр.
Гирами Каламдиъ гъудгникан швнуб ражари кlваин дапlна?
Гирами Каламдиъ 700 ражари гъудгникан дупна.
Гирами Каламдиъ «Аллагь» кlуру гаф швнуб ражари текрар шула?
2698 ражари кlваин дапlна.
