Ляха гъулаъ цlийи мист

Гирами Рамазандин вазли вари шагьрар-районариъ ушварин вазлиз бахш дапIнайи аьхю серенжемар кlули гъушну. Табасаран райондиъра, варирайондинси, кIул’инди-кIул’инди гъуларинра жямяаьтлугъ ифтарар гъахьну. Гьадрарин арайиъ Ляха гъулаъ вари жямаьтлугъ уч духьну гъубху ифтарра а.

Дупну ккундуки, му гъулаъ цlийи мистра дапlна, думу мистаъ гъудгнар апlури гьацl йистlан артухъ ву. Магьа гьаму ифтарин берекетлу мажлиснаъ райондин ва гъулан имамари мист тикмиш апIбак жвуван пай киву жямяаьтдиз ва дурарин арайиъ вартIан гизаф зегьмет гъизигу ксариз чухсагъул гъапну.

Мажлис ачмиш апlури, гъулан имам Нариман Мурадалиевди вари уч духьнайидариз чухсагъул гъапну ва диндин ляхнариъ иштирак шулайивализ баркаллагь къайд гъапlну.

Хянягъ гъулан имам Надир Зулфикьаровди уч духьнайидариз яркьуди ва гъаври шлуганси диндин мурхьларикан ктибтну.

Уьгълигъ гъулан имам Аьбдурягьим Тlагьировди, инсан кечмиш духьну, думу фаракьат апIбахъди аьлакьалу фарзарикан, суннатарикан ва гьацира накьварихъна гъягъюваликан яркьуди ктибтну.

Ниъматулла гьяжийи жямяаьт гъудгниъ иштирак хьувалин фазилатваликан ктибтну, дугъу, мистарин утканвал инсарихьди мист абцlувал ву, гъапну.

Гьясамудин Гьясанбековди уч духьнайидариз мусурмнарин арайиъ дубхьну ккуни гьякь-гьюрматнакан, чвеваликан ктибтну ва сари тмунурин терефназди чlуру гафар дупну даккниваликан гъапну.

Табасаран райондин имам Ансар Рамазановди чан улхбаъ вари уч духьнайидариз чухсагъул гъапну ва, гьич саб ляхнизра дилигди, мусурмнари чпин арайиъ сабвал дюбхну ккуниваликан кдибтну.

«Гьяйифки, саспидарикк мужри кка, хъа тмундарик ккадар кlури, улхури шулу, садариин тюбетейка ал, тмунуриин алдар, мугъахь сюбюгьнар хьа, хъа тмунурихьсан хьтар - гьамцдар гафарин кlуллан фукьан вушра гьюжатар шула. Гъачай, гьамрар вари ярхла дапlну, ихь арайиъ гьякь-гьюрмат ва чвевал уьбхюрхьа, гьюрматлу уч духьнайидар», - къайд гъапlну райондин имамди.

Мажлиснан аьхириъ райондин имамди Ляха гъулан имам Нариман Мурадалиевдиз пешкеш тувну. Думутlанна гъайри, гъулан имамдин ва жямяаьтдин терефнаан мистахъ артухъси зегьмет гъизигдариз ва жямяаьтдин арайиъра активвал улупурайидариз пешкешар тувну.

Гьамци му гъулаъ гирами Рамазандин вазли аьхю мажлис кIули гъубшну.

Гъит Аллагьу Тааьлайи варидарин ужувлан ляхнар кьабул апlри, гъит ихь гьарурин гележег акуб ва яркьуб ибшри.

Муслим Аьбдуллаев