Диндин къанун...
Ихь Пайгъамбар
(Салават ва
Салам дугъаз)
Кьиблайизди
Илт1ик1уру,
Сар Аллагьдиз
Дап1ну дюаь,
Хъасин дугъу
Аьсгьябариз
Гьамци к1уру:
«Диндин къанун
Дубгъай дикъат.
Сарун даршул,
Белки, узхьан
Гьяж ап1узра
Учвухъди зат».
Хъасин душвахь
Дурккну девйир,
Варидиз йикк
Пай гъап1нийи.
Девйир гъурккдар
Пайгъамбарна
(Салават ва
Салам дугъаз)
Аьли вуйи.
Гъурбан гъап1у
Йикк ип1бахъан,
Ихь Пайгъамбри
(Салават ва
Салам дугъаз)
Алдап1у к1ул,
Хъюгъну арччул
Терефнахъан,
Ва пай гъап1у
Аьсгьябариз.
Гагул тереф
Кушар туву
Абу-Тальхдиз.
Дюаь дурхну,
Мистаз гъафи
Ва илдицу
Кябайилан.
Гъудган дап1ну,
Замзамдин шид
Дубхъну, думу
Кьяляхъ гъюру
Мина к1уру
Дерейизди.
***
Сафар вазлин
Аьхир вуйи.
Ихь Пайгъамбар
(Салават ва
Салам дугъаз)
Кет1ерццнийи.
Нубатнахъди
Хпарихъди чан
А сюгьбатнаъ
Ярхи йигъан.
Гъизгъин хьибган
Уьзур, гъурху
Аишайин
Хулаз думу.
Ихь Пайгъамбрин
(Салават ва
Салам дугъаз)
Хаиш гъабхьи:
Мединайин
Ургуб жюре
Гъуйдиан хуб
Са-саб илж шид
Ва улубзуб
Чан жандиин.
Шид улубзган,
Рягьят гъабхьи
Ихь Пайгъамбриз
(Салават ва
Салам дугъаз).
Гъудган ап1уз
Гъушу мистаз.
Минбарихъан
К1ур явашди
–Шюкюр ибшри
Сар Аллагьдиз,
Вари шулу
Амриинди
Сар Аллагьдин.
Гьерхри ачва,
Учвхьан жара
Шула к1ури
Ичв пайгъамбар.
Пайгъамбраркан,
Ваъ, гьич сарра
Гъузну адар
Чан халкьдихъди.
Узура шул
Учвхьан жара
Амриинди
Сар Аллагьдин.
Ансарариз
К1ури аза:
Уьбхяй гьюрмат
Мухаджрарин.
Йиз васият
Мухаджрариз:
Хъебехъачва
Ансарарихъ.
Гьарган йихьай
Рягьимлудар
Ва имшагьдар.
Ккундуш учвуз
Аьхиратдиъ
Кавсар булгъихъ
Узухъди хьуз,
Дап1ну ккунду
Варди фарзар,
Духьну ккундар
Затра аьрзар.
Суннатарра
К1ваин уьрхяй,
Хиларна мелз
Сикин гъитай…
Ихь Пайгъамбри
(Салават ва
Салам дугъаз)
Чан яракьар
Аьсгьябариз
Пешкеш гъап1у.
Хулаъ айи
Динарарра
Пай гъап1нийи.
Гьадму йишван
Аишайи
Лампайиз ччим
Бурж гъап1нийи.
Кьасумов Амир Мирзаевич,
Жулжагъ гъул.
РФ-йин жюрбежюр искусствойин ва литературайин конкурсдин лауреат ва дипломант:
Медаль Москва 1985.
Медаль Москва 1987.
Медаль Москва 1989. Дагъустан Республикайин культурайин лайикьлу работник (2004 й).
РФ-йин журналистарин Союздин член (2005 й).
РФ-йин уьмуми образованияйин лайикьлу работник (2006 й).
РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.) "Табасаран райондин улихь лайикьлувализ лигну" - медаль, 29.08.2024.
