Бализ ккилигурайи дада…
Ассаламу аьлайкум, аьзиз дустар! Му кагъаз бикlураза кlваъ лап дерд ади. Магьа гирами Рамазандин ваз улдубчlвну гъубшну, дидихъди - гирами машкварра.
Машквар йигъан сар касдихьна улукьуз гъушза. Му хулаъ айи дишагьли лап пашманди дуснайи. Гафар-чlалар апlури, му касдин дерд-гьялнакан гьерхза. Лигуруш, му кас жвуван веледдихъан дердну арцlнайи.
«Магьа гирами Рамазандин ваз улдубчlвну, гъи машквар йигъра ву, амма йиз бали зенгкьан гъапlундар. Гъуншйирин баяр-швушвар чпин дадйирин машкврак дуфна, хъа йиз бали зенгкьан гъапlундар. Я Рабби, гьаму жара бабаритlан узу йиз веледдиз харжиди гъилигнийкlан?! Гьаму йиз вари жигьил уьмур гьаму веледарихъ тувунза, аьхи. Йигъ-йишв дарпиди гьамрарин гъайгъушнаъ шуйза. Гьамузра гьадрарикан ккуниб фукlара адарзуз-гьа. Эгер гъюз шулдарш, саб зенгкьан апlри сарун. Узузра йиз бай рякъюз ккундузуз, узузра худлар рякъюз ккундузуз. Бабан юкlв гьамциб ву. Гьяйиф, бализ бабан кlвакан хабар адар, гьяйиф дугъаз му кlваъ айи дерд аьгъдар. Ярхла адар аьхи, дуфну саб сяаьтди улукьну гъягъюз шулдайкlан?», - гьамци гъапну му халайи.
Гьамус гьацдар баярихьна илтlикlуз ккундузуз. Эй жигьилар, эй дади дугъмиш гъапIу веледар! Учву гьапlрайидар вучва? Гьаз му гьялнаъ ачва? Гьаз жвуван багъри дадйирикан гьархначвуз? Гьаз дурари учвухъ гъизигу зегьметнакан гьархначвуз?
Гьаму суалариз фицдар жавабар тувуйкlан? Гъийин девриъ зенг дапlну гьерхуз шлуган, ужудар машинар айиган, дадйириин улулукьди фици гъузрачва?
Яваш-гьа, закурин йигъра хъайиб ву. Закур яв веледари увкан гьапlруш, дидкан кlваълан магьапlан. Эгер уву дици хьибдар кlуруш, гъалатl вува. Аллагьу Тааьлайи гьичра дици гъибтидар. Дугъаз вари рябкъюра, Дугъаз вари ебхьура.
Закурин йигъан уву, гьяйифар зигури, гьарйир гъапlну кlури, чlяаьн шулдар, думуган кьан хьибди.
Гъит ихь абйир-бабар чlивиди имиди дурариз гьюрмат апlуз Аллагьу Тааьлайи ухьуз варидариз кюмек туври, гъит гележег акуб ибшри.
