Дурарихъ хъугъуз хай шулин?
Дурарихъ хъугъуз хай шулин?
Гележегдиъ фу шулуш, чан кьисмат фициб шулуш аьгъю апIуз инсандиз гьарган аьшкь ади шулу. Му маракьлувализ гизафси чIуру терефра ади шулу, гьадму тереф ишлетмиш апIурайи жинжлари, инсанарин уьмриз, гележегдиз лигуб теклиф апIури, ухьу чпин сюгьриъ тIаъри шулу.
Дурарихъ хъугърудар фалчйирин гьяракатари кми-кмиди аьхю буржариъ тIаъру, дурариз цIийи читинвалар арайиз хуру. Чпихьна илтIикIурайидарин тIалабарикан хабар айи фалчйириз чпин насигьят масу тувуз аьгъя, хъасин насигьят гъадабгъдариз думу вари уьмриъ хътIюбкьюб алабхъуру.
Магьа учу гьациб дюшюш гъабхьи хизандикан ктибтбанди гъахьунча, гъит думу ухьуз вардариз дарс ибшри.
Жилири ктибтура: «Йиз хпири шубур риш гъахну. Юкьурпир вуди бай духьну ккундийчуз. ВуйиштIан, йиз хпир, узуз чIалкьан дарпиди, фалчийихьна гъягъюри гъахьну. Фалчийи дугъаз гъапну: «Учвуз анжагъ шубартIан хьидар, дурарикан сар багарихьди кечмиш хьиди ва увуна жилир жара хьидичва. (Узу думу дишагьлийи йиз хпириз гъапибдихъ хъугъундайза. Гьамусра фалчйирихъ хъугърадарза).
Йиз хпир юкьур кIуру бицIир кади гъагъдиъ айи. Бязи дишагьлийир фалчйирихъ ва дурарстар жарадарихъ хъугъри шлуб саризра сир дар. Хпири узуз, ухьуз шубур бицIир чIяаьн ву, юкьур кIурур гьазкIа дарихь, мидланра савайи, думура риш хьиди, кIури, аьрзйир апIуз хъюгънийи.
Думу дюз дарувалин узу гъавриъ гъахьиза, йиз хпири мици думу фалчийихъ хъугъну кIурайиб вуйи. Йиз фикриан, духтрарихьан гьеле УЗИ-йиинди бицIир бай вуш, ясана риш вуш, аьгъю апIуз вахт дубхьнадайи. Жикъиди кIуруш, узу хпир больницайиз гъухунза, ва дугъу бицIир чIур гъапIну. Хъасин духтри, думу велед бай вуйи кIури, гъапну.
Думу аьзаб гьамусра кIваъ имийиз. Дидхъанмина сарун бицIидар гъахьундарчуз. Думу ляхин 1983-пи йисан гъабхьиб вуйи. Гьарган аьзиз Аллагьдикан ﷻ мициб ляхин гъапIу учлан хил алдабгъуб ккун апIури шулза...
Учу гьамусра сатIиди яшамиш шули имича. Сар кIуру шураз юкьур бицIир айич, кьюр кIуруриз – йирхьур, шубурпириз – миржир. Шюкюр ибшри аьзиз Аллагьдиз ﷻ, ич шубари дициб ляхин гъапIундар.
Аьзиз ватанагьлийир, фалчйирихьна мягъянай, дурарихъ зат мухъугъанай. Даршиш жвуванра, жарадаринра уьмур пуч апIидичва, хъа аьхириъ, учуси, швумал хьидичва»
