Йишвандин гъудгнариъ урхурайиб сес ягъалди, хъа тмундариъ жвувакди гьаз кlуру?
Гвачlниндин, лавландин ва хъитlирхбандин гъудгнарин сабпи кьюб ракааьтариъ ягъалди гьаз убхуйкlан, хъа имбу гъудгнариъ жвувакди гьаз урхуйкlан, кlури суал шулу. Му суалнан гьякьнаан гизафдариз аьгъдар, гьеле гъудгнар апlурайидариканра саспидариз кмиди.
Гирами Каламдиан гъудгниъ сес ягъалди аятар урхбан гьякьнаан жюрбежюр фикрар а.
Дурарикан сабпи фикир адлу аьлим Аьли Шибрамалюсийи «Нигьаят» китабдиз мяна туврайи йишваъ дупна.
حكمة الجهر في موضعه والإسرار في موضعه أنه لما كان الليل محل الخلوة ويطيب فيه السمر شرع الجهر فيه إظهارا للذة مناجاة العبد لربه وخص بالأوليين لنشاط المصلي فيهما والنهار لما كان محل الشواغل والاختلاط بالناس طلب الإسرار لعدم صلاحيته للتفرغ للمناجاة وألحق الصبح بالصلاة الليلية؛ لأن وقته ليس محلا للشواغل عادة
Думу фикриинди, йишвандин вахтна гъудган апlурайир инсанарин арайиъ шулдар, ляхнихъ шулдар ва дугъаз чан Агъайихьна илтlикlуз рягьятди ву. Гьаддиз, аьлимари, йишвандин гъудгнариъ ягъалди убхуб ужи ву, гъапну. Хъа йигъандин вахтна инсан ляхнариин шулу, инсанарин арайиъ шулу ва гьаддиз думу гъудгнариъ жвувакди урхуру, гъапну. Гвачlниндин гъудганра ягъалди урхбан гьякьнаан кlуруш, думура йишвандин гъудгнарик мисал шула, гьаз гъапиш думуганра ригъ удубчlвну акуди шулдар ва инсан ляхнихъ шулдар, чпин хулариъ шулу.
Кьюбпи фикир Имам Баджурийи ва жара аьлимари хура.
Дидин мяна гьациб вуки, Пайгъамбари ﷺ вари гъудгнариъ ягъалди урхури гъахьну, хъа мекканлуйирин арайиъ айи диндин душмнари му аятар Гьаурилан ва Пайгъамбарилан чlуру гафар кlури гъахьну. Гьаддиз хъитlирхбандин ва гвачlниндин гъудгнар ягъалди урхури гъахьну, гьаз гъапиш думу вахтна мекканлуйир даахнади шуйи. Гьацира лавландин гъудган ягъалди урхури гъахьну, гьаз гъапиш думу вахтна вари уьлихъ хъади шуйи. Йигъандин вахтна апlру гъудгнариъ, мушрикари зарар тутрувбан бадали, аятар жвувакди урхуйи,.
Му гьюкум гьадму вахтнануб гъабхьнушра ва гъи дицдар манигъвалар адашра, думуган дебкку къайда гъийин йигъанра тамам дапlну ккуниб ву.
Магьа му ляхнин гьякьнаан гьамцрар фикрар а. Гъит Аллагь ухьуз варидариз кюмек ишри!
