Ничlрас гъулаъ аьхю мажлис

Табасаран райондиъ гьяфтайик сабан, ясана кьюб гьяфтайик сабан сабунуб дарш сабуну гъулаъ мажлис шулу. Думу мажлисарикан аьхю мянфяаьт айивализ лигну, райондин имамарин Советди гьациб къайда дебккна.

 Магьа 21-пи сентябри Ничlрас гъулаъра гьациб серенжем кlули гъубшну.

Душваз вари гъуландар уч духьнайи. Сабпи нубатнаан, табасаранлуйирин хялижвувахьна вуйи гьюрмат уьбхюри, дуфнайидариз варидариз ипlруб гьивну.

Магьа гирами аятар дурхну, гъулан имам Мягьмуд Гьяжиевди мажлисра ачмиш гъапlу.

«Гьюрматлу гъуландар ва дуфнайи хялар! Учвуз варидариз му серенжемдиъ иштирак хьпан кlваантlан чухсагъул кlураза. Гъит Аллагьу Тааьлайи ухьу туву садакьа, гъапlу ужувлан ляхнар ва ихь гъибадат заан дережайиинди кьабул апlри», - гъапну Ничlрас гъулан имамди.

Каспийскдин сабуну мягьлайин мистан имам Анвар гьяжийи уч духьнайидариз Пайгъамбарихьна ﷺ дубхьну ккуни мюгьюббатнакан, дугъан рякъюъди гъягъбан заанваликан ктибтну.

Чвулатl гъулан имам Аьгьмад Сеферовди кучlал апlувал диндиъ лап гъадагъа дапlнайи ляхнарикан саб вуйибдикан гъапну.

«Гьюрматлу чвйир ва чйир! Кучlал апlуб аьхю гунгьарикан гьисаб шула. Пайгъамбари ﷺ чан гьядисариъра кучlал мапlанай дупна. Амма, гьаци вушра, саспидариан думу ляхин дипуз удукьурадар. Кучlлариинди чпин мадар апlурайидарра цlиб адар, амма думу хайир кайи ляхин дар, дидкан зарар гизаф а», - гъапну Аьгьмад Сеферовди.

Жулжагъ гъулан имамдин заместитель Исмаил Аьгьмадовди, мусурман касди Пайгъамбарихъан ﷺ фициб нумуна дибисну ккундуш, гьаддикан ва дугъан заан гъиллигъарикан ктибтну. Гизафдари фикир тувурдар, амма бицlидарихъди фици янашмиш духьну ккундуш, аьхюдарихьна фициб гьюрмат ади ккундуш – яни инсандин вари ужудар гъиллигъар суннайиъ улупна, гьятта гьяйванатарихьнара вуйи янашмиш’валра кмиди.

Мажлиснаъ гъулан агъсакълар Тlагьирбег халу ва Сядулла халу, гъулан жямяаьтлугъдин сабвал дюбхну куниваликан ва жигьил имамдиз кюмек тувну ккуниваликан дупну, уч духьнайидариз варидариз чухсагъул мялум гъапlну.

Табасаран райондин имам Ансар Рамазановди уч духьнайидарин улихь удучlвну улхури, гъулаъ цlийиди дерккнайи имамдиз кюмек тувуб ккун гъапlну.

«Гьюрматлу Ничlрас гъулан жямяаьт ва уч духьнайидар! Ихь мажлис Аллагьди кьабул апlри. Гьар касдин туву садакьара заан дережайиинди кьабул апlри. Магьа ичв гъулаз цlийи имам дуфну гизаф вахт дар, амма му бицlи вахтна жигьил имамди саб кьадар ляхнар арайиз духна. Гъит Аллагь дугъкан рази ишри. Ичв терефнаан дугъаз гафниинди ва ляхнариинди кюмек апlуб тlалаб вуйиз. Ургуд йисан медресейиъ дурхну, чав айи йишв гъибтну, магьа гьаму гъулаз дуфна. Му касдин зегьметназ ухьу чухсагъул дупну ккунду. Гьаму мажлис апlузра магьа касди фукьан зегьмет дизигна. Мицдар мажлисар ухьу ккадаъну ккундар, дурарикан хайир кадабгъну ккунду, мицдар мажлисар жвуваз аьгъдруб дубгъру мажлисар ву», - гъапну райондин имамди.

Мажлиснаъ имамарин, аьлимарин улхбарин арайиъ мавлидар-нашидар урхуйи.

Гьамцдар мажлисариъ иштирак йихьай, аьзиз ватанагьлийир! Мурарикан ухьуз ва ихь хизанариз, гъул-жямаьтдиз аьхю мянфяаьт а.

Муслим Рашидов