Эй жигьилар, жигьилар!
Эй жигьилар, жигьилар!
Жигьил вахт инсандин фунуб вушра ляхин кlулиз адабгъуз аьшкь кайи, кьувват айи вахт вуди шулу. Му вахтна фуну ляхникан улхури гъахьишра, жигьилар кlакlнаъ шулу. Ав, му лап ужуб ляхин ву, эгер жигьилар халкьдиз мянфяаьт тувру ляхнин улихь шулуш.
Хъа му макьалайиъ узуз пуз ккундайиб жараб вуйиз - жигьиларин диндихьна вуйи рафтар. Гьямд ибшри Худайиз, йигълан-йигъаз ихь арайиан арагъ убхъивал, папрус зигувал кам шула. Чпин гъудган апlури, жигьилар диндиъ гъадагъа дапlнайи ляхнарихьан ярхла шула - му ляхни ихь юкlвар шад апlура.
Амма гьяйифки, жигьиларин аьхюдарихьна, яшлуйирихьна, аба-бабахьна вуйи гьюрмат лап зяиф шула. Аьхюдарихьна гьюрмат адрувал лап чlуру гъиллигъарикан гьисаб ву. Му ляхниз учву фикир тувну ккунду, эй жигьилар!
Ихь арайиъ сабсана учlруди дугъубжвнайи месэла а: жигьиларин диндихьна вуйи рафтар. Гъи бязи жигьилар гьякьлу аьлимарихъ хъпехъурадар, дурариз интернетдиъ саб фулану жара гьюкуматариъ дусну ихь мусурмнарин арайиъ футна ипрайи аьлимар кьабулди ву. Фунуб-вушра саб ляхин ихь жигьилари чпи гьякьлу аьлимарихьан гьерхну аьгъю дарапlди, шлихъ вушра хъпехъури апlура. Мусурмнари сари тмунуриз кяфир кlура, гьеле саб себебра адарди ва тмуну касдиз кяфир пуб гъадагъа дапlнашра. Думутlанна гъайри хъанара цlийи рякъяр удучlвна жвумийин йигъан жвуми гъудгниз дяргърудар, абйир-бабариз кяфирар кlурудар, чпин шубар тмуну мусурман касдиз тутруврудар, дурар мусурмнар дар кlури лицурайидарра а.
Пуз ккуниб саб вузуз: Эй жигьилар, ихь халкь чlур мапlанай. Учву апlурайи ляхин дин бадали вуйиб даричв, хъа диндихьан инсанар ярхла апlурайиб вуйичв. Учву апlурайи ляхнариз гъилигиган, учву улупурайи эдебсузвалиан инсанар диндихьна гъюрайидарра ярхла шула. Гьяйифки, учвуз ичв гафартlан ерхьурадарчвуз, вари дюн’яйиъ машгьур аьлимарин гафаркьан ерхьурадарчвуз. Учву хъпехъурайидар анжагъ сар-кьюр бегьем илимкьан ктру «интернетдин аьлимар» вуйичв. Дици дубхьну ккундар. Думутlанна гъайри, ичв арайиъ саркьан илим дурхнайи кас адар, аьраб чlалниинди дурхну тажрума апlуз шлур адар, хъа саб гъушу йишваъ варитlан дин бадали юкIв убгурайидар учву вуйиганси улупурачва. Гъачай му ляхнарикан фикир апlинай.
Ичв гафариинди мавлидар апlуз хай шулдар, уч духьну Пайгъамбарин () тяриф апlуз хай шулдар, зикир апlуз хай шулдар, хъа думу вахтна учву гагь мушваъ, гагь жара йишваъ уч шули имбу мусурмнариз «кяфир» кlуру ччвур туври лицурачва.
Гьамциб дюшюшдиъ кlури шулу гьямд ибшри Гъиямат йигъ айиб ва гьадмуган гьарсари му жилиин гъапlуб арайиз удубчlвиди.
Шариаьтдикан гафар апlруган гизафдариз шариаьт кlуру гафнан мянакьан аьгъдар, хъа инсанарин арайиъ наразивалар ирчруган варитlан улихь ву. Фу вахтнахъна дуфнадаринхъа?!
Улихь вахтари я гъудган апlуз гъидритруган, ясана жара диндин ляхнар апlуз гъидритруган гьациб читинвалиинди ихь аьхю абйир му дин ухьухьна рубкьуз гъитну Аллагьу Тааьлайин амриинди. Хъа гъи кьюб гьярфкьан аьгъдру жигьилари думу аьлимартlан чпи заанди дерккна, чпи аьгъюдарси улупна. Амма гьеле гьадму аьлимари гъизигу зегьметнан саб проценткьан чпи дапlнадар.
Сар яшлу касди гъапну: «Му жигьиларихъ хъпехъуруш му жилиин гирами вуйиб фукlара алдар, мурарин гафариинди чпитlан аьгъю агьларра адар, гьаддиз йиз веледариз узу мицдарихьан ярхла йихьай кlури шулза».
Ав, узу зиихъ гъапиганси сацlибкьан фикир апlру ксариз му жигьилари кlуру гафарихьан гучl шулу.
Гъи ухьуз дин хъапlуз вари мумкинвалар тувна. Увуз ккунду гвачlниндин гъудгнихъанмина хъитlирхбандизкьан мистаъ иътикаф апlин, увуз гафра кlурур адар. Амма дици апlурадар, мистаъ вахт адапlурадар, хъа «гъардшарихъди» дусну имбу мусурмнарик кайи нукьсанвалар агури дусуз вахт а.
Кlваинди гъибтай, Ислам дин учвлан, ясана жарарилан асиллу дар, думу фужкlа хътаршра улихь гъябгъиди, амма учвкан ккуниб саб ву, ихь халкь инжиг мапlанай, жямаьт кяфираризна мусурмнариз пай мапlанай. Мусурман кlуру ччвур алидарикан «кяфирар» апlуз гьаз гьялак вучва? Гьадрариз «кяфирар» гъапиган кlваз рягьят шуланичв? Дарш «кяфир» кlуру ччвур тувбиинди вари дин тамам шула кlуруб наанкlа дибикlнайин?
Адлу аьлимари сар касдиз «кяфир» пувалин гьякьнаан китабар дидикlна, фетвйир адагъна, хъа му жигьилариз дурар сабкьан герек дар, диндикан варитlан «аьгъюдар» гъи гьамрар духьна.
Гьаддиз варидарихьна илтlикlураза, ичв веледари гьапlраш, шлихъди дуствал гъабхураш фикир тувай. Гъит дурарин дустар хайир туврудар, халкьдихъан, мусурмнарихъан юкlв убгрудар ишри, хъа мусурмнарин арайиъ футна ипрудар ваъ.
Гъит Аллагьу Тааьлайи ухьуз гьякь вуйиб гьякьди улупри, хъа кучlлихьан ярхла хьуз кюмек туври му фитнайин вахтна.
Гьарурин гележег акуб, ягъурлуб ибшри! Амин!
