Суал-жаваб

- Узхьан гвачlниндин гъудгниз гъудужвуз шуладарзухьан. Гьар йигъан ккадапlураза. Йиз ккудубшу гвачlниндин гъудган лисундин гъудган гъапlхъан дишлади кьаза апlури шулза. Шариаьтдиинди йиз гьял фициб шуйкlан?

- Гвачlниндин гъудгниз гъудужвуз шуладарзухьан кlуру гафар асуллагь гьякьлудар дар. Эгер гьадму гъудгнин вахтна увуз пул тувра, гъач гъапиш, йиз фикриан, уву дина жаргъури гъягъява. Гьаци даринхъа?

Гвачlниндин гъудгниз вахтниинди гъудужвбан бадали, йишвну вахтниинди дахъну ккунду ва гъудужвуз ният ади ккунду. Мидихъди сабси «Кагьф» сурайин аьхиримжи аятар урх ва будильник дебкк, ясана хулаъ айидарикан уву уягъ апlуб ккун апlин.

Вахтниинди гъудужвну, гвачlниндин гъудган дапlну, Аллагьу Тааьлайин саваб гъазанмиш апlин.

Эгер вари себебар гъапlнушра уягъ гъахьундаш, вахтниинди ккудубшу гъудган кьаза апlин, лисундин гъудгнин вахт хьайиз ккилигури гъузну ккундар.

Кlваинди гъибт, гъудган диндин мурхьул ву.

- Инсан кечмиш гъахьиган, садакьа хулан эйсийи чаан удукьруси тувруб вуйин, дарш гъулан аьдат дапlну ккундийин?

- Садакьа гьарсар касди чан мумкинвалариз дилигну тувруб ву. Инсан кечмиш гъахьиган вушра, жара дюшюшариъ вушра, садакьа гужниинди тувуз гъибтруб дар. Ваяки, гъулан аьдат апlурза кlури, буржарикк ккучlвну апlрубра дар. Гьяйифки, сасбидари, аьйибнакк ккахъручу кlури, буржарикк ккучlври аьдатар апlури шулу. Думу дюзи ляхин дар. Инсан кечмиш гъахьну кlури, харжар гьаз апlуру? Фу бадали? Майтихьна вуйи фарзар юкьуб ву, гьадрар тамам гъапlхъанмина сарун саб жюрейинра харжар герек шуладар. Хъа инсанари чпин аьгъдрувалиан, ясана инсанари аьйиб апlуру кlури гучlрувалиан диндиъ адру ляхнарра апlуз хъюгъру. Гьаддиз жвуван дин, жвуван фарзар ва суннат ляхнар аьгъю дапlну ккунду.

- Гизаф кучlлар кайир вуза. Кучlлар апlуб герек дару дюшюшариъра кмиди кучlал апlури шулза. Думу аьхю гунагь вуйибра аьгъязуз, амма гьапlруш аьгъдарзуз.

- Думу гизаф чlуру ляхин ву. Хъа уву му тахсир арайиз адабгъну, думу аьхю гунагь вуйивалин гъаври хьувал ужи ву. Гъач гьамциб ляхниз фикир тув. Йигъандин арайиъ кучlал апlуз ккуни йицlуб дюшюшдикан саб дюшюшдиъ думу ляхин мапlан, хъа йигъан кьюб ражари. Гьаци увуз думу ляхин дипуз шлуб аьгъю хьибди. Му суалназ жаваб туври узу гьядисар гъахну кlури, увуз мянфяаьт адар, гьаз гъапиш увуз думу чlуру ляхин вуйибра, диндиъ хай даршлуб вуйибра аьгъязуз кlурава. Гьаддиз гьаму ухьу гъапи жюрейиинди яв фарзар тамам апlуз чалишмиш йихь.

- Гьарган, гьаму жилиин яшамиш духьну гьаз вухъа кlури, йикlуваликан фикрар ади шулуйиз. Аьссивал апlурадарза, амма дицдар фикрар кам шуладар.

- Кечмиш хьуваликан фикрар апlувалиъ чlуруб фукlара адар, думу ухьуз Аьхират кlваин апlурайиб ву. Уву гъапиганси, аьссивал дапlну ккундар. Аьссивал адарди кечмиш хьуваликан айи фикрар зарар кайидар дар. Анжагъ Аьхират бадали дапlну ккуни ляхнариканра фикир кади ккунду.

- Нюкягь апlруган, бай хъади хьуб герек вуйин?

- Нюкягь апlувал ихь хизан ккебгъувалин варитlан асас фикир тувну ккуни ляхин ву. Гьяйифки, саспидари му ляхниз думукьан фикир туври шулдар, ва гизаф дюшюшариъ гъалатlарра апlури шулу. Нюкягь апlруган, шлубкьан бай хьади хьуб ужи ву, гьаз гъапиш душваъ хизан ккебгърайи жигьил бай ва шуран адаш иштирак шула. Эгер мурарихьан шуладарш, шариаьтдиъ улупнайи къайда а. Думутlанна гъайри, никягь гьякьлуб хьпан бадали, иштирак шулайир мусурман духьну ккунду, анжагъ тек саб гафниинди вуйи мусурманвал ваъ-гьа, хъа Аллагьу Тааьлайи илирчнайи фарзар тамам апlурайир духьну ккунду. Эгер кагьалвалиан, ясана жара себеб ади фарзар тамам апlурадарш, нюкягь ккебгъайиз думу ляхнарихъан туба дапlну, жвуван фарзар тамам апlурза кlури, ижми ният дапlну ккунду. Имамди, аьлимди нюкягь апlруган, варидариз шагьадат келима хурхьа, хъа туба апlурхьа кlури шулу. Му фукьадар фикир тувну ккуни ляхин вуш, гьамдиан рябкъюрахьуз.

- Эгер инсандин хулаъ, мисалназ, 700 агъзур манат пул аш, дугъаз гьяж фарз шулайин?

- Гьяж тамам апlуб дакьатар, жандин сагъвал айи гьарсар мусурман касдин фарз ву. Ав, дициб кьадар пул айи касдиз гьяж тамам апlуб фарз шула. Гьаддиз жвуван жандиъ кьувват имиди, пулин дакьатар имиди, вахтниинди гьяж тамам дапlну ккунду. Гъит Аллагь кюмек ишри.