Гуми гъулаъ аьхю серенжем

21-пи авгъусти Табасаран райондин Гуми гъулаъ Пайгъамбар ﷺ бабкан гъахьи ваз улубкьбан гьюрматнаан аьхю мажлис кlули гъубшну.

Гьар йисан ихь республикайин шагьрариъ ва районариъ, Пайгъамбарин ﷺ уьмрикан ктибтури, дугъкан назмар урхру мажлисар шулу.

Дупну ккундуки, мициб аьхю серенжем Гуми гъулаъ 2019-пи йисхъанмина гъабхьундайи.

Му йигъан Гуми гъулан жилар, дишагьлийир, бицlидар вари му гюзел мажлисназ уч гъахьнийи.

Мажлис ачмиш апlури, Гуми гъулан имам Низами Шябановди уч духьнайидариз варидариз кlваантlан чухсагъул гъапну.

«Гьюрматлу имамар, аьлимар ва гъулан жямяаьт! Гъийин мажлис ухьуз Пайгъамбарин ﷺ уьмрикан мялумат гъадабгъуз мумкинвал туврайи мярака ву. Дидкан ихь гъул-жямяаьтдиз зурба мянфяаьт хьибди. Му серенжем тешкил апlуз кюмек гъахьидариз кlваантlан чухсагъул кlураза. Гъит Аллагьу Тааьла учвкан рази ишри», - гъапну Гуми гъулан имамди.

Уч духьнайидарин улихь Гурихъ, Ягъдигъ, Халагъ, Гьепlил гъуларин имамар удучIвну гъулхну, ва гьарури чан насигьятнан гафариъ, сари тмунур аьлава апIури, Пайгъамбарин ﷺ уьмрикан ктибтну.

Табасаран райондин имам Ансар Рамазановди, мицдар мажлисарикан фициб мянфяаьт аш, яркьуди ктибтну.

«Гьюрматлу Гуми гъулан жямяаьт! Аллагьу Тааьлайи му мажлис кьабул апlри. Гъит ихь гьарсаб хизандиъ берекет ва шадвал ибшри. Ухьхьан варидарихьан аьлимар хьуз даршул, саспидарихьан тялимарра хьуз шуладар, амма гьамциб мажлиснаъ иштирак духьну, саб гьядис вушра ахтармиш апlуз даршлудар адар. Ихь мурад-метлебра гьадму вуйихь - жвуваз аьгъюб аьгъдрудариз ктибтуб. Гьаци гъабхьиш, йиз фикриан, сацlиб вушра ихь диндин аьгъювалар яркьу шул. Дишагьлийирихьна илтlикlури кlуразаки: учву тазиятариз гъушган, динди гъадагъа дапIнайи ляхнар мапlанай. Саламдиз гъушган, майтиин гьаз пулар илирчурачва? Думу диндиъ айиб дар. Думу ляхин гьаз апlурачва? Аьдат бадали? Тмуну ксари фу пиди, кlури? Магьа гьамци тмуну касдин гафнахьан гучlури, ихь уьмур гъябгъюра», - къайд гъапlну райондин имамди.

Имамарин, аьлимарин вяаьз-насигьятнан гафарин арайиъ Пайгъамбарикан ﷺ вуйи назмар урхури, мажлис кlулиз адабгъну.

Гьамдихъди пуз ккундузузки, мицдар мажлисар гьарсаб гъулаъ духьну ккунду. Му мажлисарикан жвуван жямяаьтдиз, хусуси вуди дишагьлийириз аьхю мянфяаьт а. Мушваъ вяаьз-насигьят, суал-жаваб шула. Жвуваз аьгъдруб дубгъура. Гьялална гьярам фу вуш ва фици гьярамдихьан ярхла духьну ккундуш, ктибтура. Мицдар мажлисарикан мянфяаьт адарди шулинхъа?!

Гъит Аллагьу Тааьлайи ухьу вари гьякь рякъ’ин мудам апlри, гъит мицдар мажлисар ихь арайиъ артухъ ишри. Гьарурин гележег акуб ва ягъурлуб ибшри!

Ильяс Омаров