Табасаран райондиъ цlийи мист ачмиш гъапlну

Ассаламу аьлайкум, аьзиз ватанагьлийир! Ухьуз туву вари ниъматарихъан ва гьацира ухьуз Ислам диндин рякъюъди, дидин къанунарихъди гъягъюз мумкинвал тувбан Аллагьу Тааьлайиз гьямд ибшри.

Табасаран райондиъ аьхиримжи йисари 10-тlан зиина мистар ачмиш гъапlну. Думу мистар гъул-жямяаьтдиъ, спонсорарин кюмекариинди кlулиз адагъдар ву. Гъит Аллагьу Тааьлайи варидари гъапlу садакьа заан дережайиинди кьабул апlри! Амин!

Магьа гьаму июлин вазлин 6-пи йигъан Дагъни гъулаъра цlийи мист ачмиш гъапlну. Думу мист ккебгъдар ва заан дережайиинди кlулиз адабгъдар Дагъни гъулан Аьгьмадоварин хизан ву.

Аьгьмадов Исмаил ва Аьгьмадова Разъяханум – жилирна хпир, гизафдариз нумуна вуди яшамиш шулайи уьмрин юлдшар ву. Исмаил халу, учв студентди имидитlан, гьарган вари ужувлан ляхнарин, коллективдин улихь шлу кас гъахьну. Магьа гъира, чпин гъуландариз заан пешкеш вуди, лап успагьи Аллагьдин хал арайиз гъабхну.

Ав, тек сар касдиз мист дивуб читинди алабхъуру, гьаддиз сабпи йигъланмина гъул-жямяаьтдира, яр-дустарира Исмаил халуйиз му ляхниъ даягъ гъахьну.

Магьа, мист дивну ккудубкlну, думу ачмиш апlру вахт улубкьну.

Табасаран райондианси, жара йишварианра хайлин инсанар уч духьнайи. Сарпир вуди жямяаьтдин улихь Дагъни гъулан имам Рамазан халуйи гафар гъапну.

«Гьюрматлу гъуландар, дуфнайи хялар ва имамар! Магьа гъи Дагъни гъулаъ аьхю шадвалин серенжем кlули гъябгъюра. Учу бадали гьарсари алдабгъу лик женнетдиъ айиб ибшри. Мицдар ужувлан серенжемарихъ ухьу мягьрум даришри», - гъапну Рамазан халуйи.

Мажлис кlули гъабхурайир Ягъдигъ гъулан имам Мугьяммад Халиков вуйи. Му серенжем гирами Каламдиан аятар урхбиинди ачмиш гъапlу.

Дагъустандин Муфтиятдин Кьибла терефнаъ айи вакил Гьюсейн Гьяжиевди чан улхбаъ гьамци гъапну: «Гъи Дагъни гъулаъ цlийи мист ачмиш апlувал анжагъ саб му гъулазтIан, ясана саб му райондизтIан дару шадвал дар, му вари республикайиз маракьлу ва хъуркьувалар айи ляхин ву. Муфтиятдин терефнаан мист тикмиш гъапlдариз, мушваъ иштирак гъахьидариз аьхю чухсагъул къайд апlураза».

Думутlанна гъайри Гьюсейн Гьяжиевди Муфтиятдин терефнаан Исмяил Аьгьмадовдиз пешкешра тувну.

Мажлиснаъ иштирак шулайи райондин главайин 1-пи заместитель Рамис Сиражутдиновичди Дагъни гъулан жямяаьт тебрик апlури гъапну: «Гьюрматлу жямаьтар, ихь райондин главайин ва гьацира йиз терефнаан учву му уткан мист ачмиш апlбахъди кlваантан тебрик апlурача. Чухсагъул Исмаил халуйизра ва му касдиз кюмек гъахьидаризра. Гьамци сатlиди ухьу ляхин гъабхури гъахьиш, хъуркьуваларра артухъ шул. Ич терефнаан учура ихь диндин улихь хьайидариз кюмек апlуз чалишмиш шулача».

Табасаран гьарвахтна аьлимарихъдира маракьлу вуди гъабхьну. Магьа му мажлиснаъра шариаьтдин илмарин доктор, Мягьячгъалайиъ айи диндин университетдин (ДИУ) гъуллугъчи Мугьяммад-Амир Мевлютовра иштирак гъахьнийи.

«Мист тикмиш апlувал заан ляхнарикан саб ву. Мистар жямяаьт сатlи апlру йишвар ву, ухьура сабвалихъна дуфну ккунду. Йиз улхбаъ асас фикир гъийин йигъан ихь жигьилариз тувуз ккундузуз. Гьяйифки, дурарикан саспидариз гьякь жараси рябкъюра, аьлимари кlуруб ебхьурадар. Себеб фу ву? Кlваъ айи агъирвал. Эгер инсандин кlваъ агъирвал гизаф аш, думу касдихьан гьякьвалра кьабул апlуз шулдар», - гъапну Мугьяммад-Амир Мевлютовди.

Магьа мист тикмиш гъапlу Исмаил Аьгьмадовдиз гаф туву.

«Гьюрматлу жямаьтар, му мист Аллагьу Тааьлайин разивал абгури арайиз дубхнайиб ву. Мушваъ вари гъуландар ва гьацира жара йишвариъ айи ихь дустар иштирак гъахьну. Гьарури чаан удукьруси кюмек дапlну, магьа гъи гьаму мист арайиз дуфна. Гьаддиз аьхю чухсагъул варидариз. Гъит Аллагьу Тааьлайи ихь варидарин туву садакьйир заан дережайиинди кьабул апlри», - гъапну Исмаил халуйи.

Му серенжемдиъ гьацира Исмаил халуйихъди гизаф йисари дуствал гъабхурайи ксар иштирак гъахьну. Дурарикан гьарури му заан савабнан ляхин апlбакан ихь жямяаьтлугъдиз айи мянфяаьтнакан ктибтну.

Мажлиснаъ гьацира Гурихъ гъулан имам Гьяжисефер халу, Жулжагъ гъулан имам Руслан Асланов, Гьепlил гъулан имам Аьбдулла Аьлиев гъулхну.

Мажлиснан аьхириъ Табасаран райондин имамарин Советдин председатель Ансар Рамазановдиз гаф тувнийи. Дугъу сабпи нубатнаан варидариз ужувлан ляхниин жалб хьпан чухсагъул гъапну ва райондиъ аьхиримжи йисари гизаф мистар ачмиш дапlнайиваликан мялумат тувну.

«Гьюрматлу гъардшар ва чйир! Гьямд ибшри Аллагьу Тааьлайиз ухьуз гьамцдар ниъматар ачмиш дапlнайивализ. Магьа Аьгьмадоварин хизанди ихь райондиз гьамциб ужуб пешкеш тувна. Аллагьу Тааьлайи чпин ният кьабул апlри ва гъапlу ляхнарин аьхю савабар дикIри. Табасаран райондиъ аьхиримжи йисари ужувлан терефназди гизаф дигиш’валар духьна. Магьа гьамусяаьт вари мистариъ бицlидариз дарсар кивуб ккебгъна, ва мистариъ дарсариз гъюрайи бицlидарин кьадар 800-тlан зиина удубчIвна. Ихь райондиз му заан хъуркьувал ву. Ав, читинвалар адарди, имтигьян дарди даршул. Хъа гъийин йигъаз ихь райондиъ шулайи ляхнариз гъилигиган, юкlв шад шулу, ва закурин йигъ хъанара акуб, ужуб, мянфяаьтлуб шул кlури умуд кивраза. Гъит Аллагьу Тааьлайи ухьуз му мистариъ артухъдиси ибадат апlуз, му мистар тухъди арцlуз кюмек туври», - гъапну райондин имамарин Советдин председатели.

Му мажлис, улхбарин арайиъ мавлидар-назмарра урхури, гьаму къайдайиинди кlули гъубшну.

Мицдар мажлисар себеб духьну, ихь халкьдин арайиъ мясляаьт, гъардаш’вал артухъ шулу. Мажлисариъ ухьуз Аллагьу Тааьлайин Каламдиан ва Пайгъамбарин ﷺ гьядисариан вуйи гафар ерхьуру. Хъа му ляхнар ихь кlваъ иман артухъ хьуз себеб шлудар ву.

Гъит Аллагьу Тааьлайи ухьуз аьхю ужувлар туври, хъуркьувалар артухъ ишри, гележег акуб ибшри! Амин!