Никягь батlил дубхьна, амма…
Никягь батlил дубхьна, амма…
Инсандик кайи хасиятарикан варитlан заанди дебккнайиб Аллагьу Тааьлайихьан гучl ади хьувал ву. Эгер Аллагьу Тааьлайихьан гучl ади вуш, инсан аьхю ва чlуру гунгьарихьан ярхла хьуз чалишмиш шулу.
Магьа улихьнаси гьамциб дюшюш гъабхьну. Жилири чан хпириз чпи жара шлу гафар гъапну - чазра аьгъяди, чав чан фикрихъра хъади. Хъасин хпири гьаму касдиз, му йигъланмина узу яв хпирди гъузрадарза, уву узуз тlалакь тувунва, гъапиган, жилири, фукlара даршул, дидкан увузна узузтlан аьгъдар, ухьу гьамуганаз фици янашмиш шули гъахьнуш, гъилахъанминара гьаци гъуздихьа, гъапну.
Лигайчва, Аллагьу Тааьлайихьан гучl адруган, жвуван диндикан аьгъдруган, инсанди гьапlраш. Гьаму чпи жара шлу гафар гъапихъантина, сарун чпи сарна-сарди саб хулаъкьан гъузуз ихтияр адрубдикан му касдиз гьич хабаркьан адар.
Ав, му дюшюшдиъ жилиринтlан хпирин фикир зиина вуди ва Аллагьу Тааьлайихьан гучl айивал артухъ вуди гъабхьну. Дугъу, аьлимдихьна илтlикlну, му суалнаан гьякьнаан вари хъайи-хъайиси жилириз ктибтуб ккун гъапIну.
Гьюрматлу газат урхурайидар, диндин къанунарихъди тамшйир дапlну ккундар. Диндин суалариз жвуван фикир вуйиганси жавабра тувну ккундар. Диндин суалариз аьлимарихьди жаваб тувуз гъитай. Уву инсанариз кучlал гъапlну кlури, Аллагьу Тааьлайиз кучlал апlуз шлуб дар. Никягь батlил шлу гафар дупну, амма гьаци вушра сатlиди яшамиш шули гъузиш, учву кьюридра аьхю вуйи гунагьнаъ ахьрачва.
Гъит Аллагьу Тааьлайи ухьуз варидариз дин марцциди, заан дережайиинди хъапlуз мумкинвал туври.
Гъит гьарсаб хизандиъ гележег акуб ибшри, хъуркьувалар ва бахтар артухъ ишри.
