Жилирин тахсир ву!
Ассаламу аьлайкум, йиз багъри халкь! Гьаму макьалайиъ сацlиб гъийин деврин жиларикан ктибтуз ккундузуз. Узу, дишагьлийи, жиларикан пубра думукьан ухшар дар, амма йиз уьмрин тажрубайиз ва яшариз лигну жигьил наслариз насигьят шул кlури, умуд кивну бикlураза.
Магьа 68 йиснан яш дубхьнайиз. Пуз шулуки, йиз уьмрин аьхириз дуфназа. Му жилиин ужубра, харжибра гъябкъю кас вуза. Узу жилириз гъафиган, хулаъ юкьурсана швушв айи, узу хьурпир ва варитlан бицlирсир балин хпир гъахьунза.
Дупну ккундуки, думуган гьаруриз, жвуваз хулар дивну, жаради яшамиш хьуз мумкинвал адайи. Вари садар хулариъ яшамиш шули гъахьунча. Гьаму хьур швушвра, мурарин бицlидарра, сижарра, сижар абара хулаъ ашра, гьич саб сес хул’ан удубчlвурдайич. Гьарсар кас чан ляхнихъ хъади шуйи, тмунурихъди гьюжатар апlуз вахт шулдайи. Мясляаьтниинди, чиб-чпиз кюмекар апlури дуламиш шули гъахьунча.
Гьамус магьа йиз хулаъра кьюр швушв айиз. Амма гъи, 4-5 швушв ваъ, гьаму кьюр швушв саб хулаъ уьрхюз читин дубхьна.
Му суалнакан гизаф фикрар апlури гъахьунза, ва гьамциб фикир кlулиз гъафнийиз. Думуган жиларра сацlиб жараси вуйи. Хулаъ алдарди саб гаф апlуз, жарарилан футнайин гаф ебхьуз гъитурдайи. Хъа гьамус хпири саб гаф гъапиш, саспи жилар дишлади гьадму гафнахъан хъчlихура, сижари чан швушваз гиран ктапlура кlури, фикир шула. Дици даршул, эй жигьилар! Учу, уьмрин тажруба айидари, хулаз духнайи швушвариз насигьят тувну ккунду, аьхюр-бицlир, хулан къайда улупну ккунду. Гьаму ляхнарикан учу швушвариз ктибтруган, жиларин, чпин хпарихьди ил хътабгъуз гъитрадар кlури, фикир шулу. Ваъ, дици дар, я гирами! Йигъар-йисар гъягъюри, хъасин швумал шулчва-гьа, гьялак махьанай. Абайизна бабаз гиран макадапlанай, дурари учвухъ гизаф зегьмет гъизигну, фукьан гъагъиди вушра, дурарихьна вуйи гьюрмат чlур мапlанайи.
Жилариз пуз ккундузуз, гизаф ляхнар учвлан асиллу ву. Эгер учву хизандиъ жилирин гаф заанди дебккрадарш, дициб хизандиъ мясляаьт уьбхюб, аьхюр-бицlир аьгъяди хьуб читин ву. Эгер хпири чан гаф заанди дебккраш, веледари чпиз ккуниб апlураш, душваъ берекет даршул.
Узу диндихьан ярхла кас дарза, хъа лап ижмиди вари къанунар тамам апlрурра дарза, узуз ич дадайи, бабу улупубдиинди ва магьа гъи гьамци диндин газатар урхури, аьлимарин роликарихъ хъпехъури, аьгъдруб дубгъураза.
Гьюрматлу редакцияйин гъуллугъчйир! Кми-кмиди жиларин чпин хпарихьна, хизандихьна вуйи макьалйир чап апlинайчва. Фукьан кlурушра, сабпи нубатнаан, жиларин диндиан аьгъювалар за дапlну, дурарин иман ижми дапIну ккунду, гьаддихъди вари хизандиъ берекет шлуганси. Дурариз Аллагьу Тааьлайин улихь жвуван фарзар, хизандин улихь жвуван буржар-гьякьяр аьгъяди ккунду.
Гьямд ибшри Аллагьу Тааьлайиз, магьа илим урхузра фукьан вушра мумкинвалар а, гъазанмиш апlузра вари рякъяр ачмиш духьна, амма гьюрмат йигълан-йигъаз кам шула. Му ляхин варидариз рябкъюрайиб ву. Аллагьу Тааьлайиз шюкюр дапlну, кlул ис дапlну гьякь рякъ кадабгъну яшамиш духьну ккун.
Саб-кьюб вазли язариз душну гъилиху баяри 150-200 агъзур манат хура, хъанара гьялал ризкь артухъ апlричпин, амма гизафдарин берекет адар. Фукьан гъазанмиш гъапlишра, гьубкlрадар, хулар-дараматар паччгьаринтlан уткан дапlна, хъа хизандиъ бахт адар, гъярхьивалар, жилирна хпир жара хьувалар гизаф дубхьна.
Сар аьлимди насигьят тувруган, гирами Каламдиан саб аят гъабхнийи, душваъ гьамци дупна: «Анжагъ Узуз ибадат апlинай ва ичв абйир-бабарихъди ужуди йихьай…».
Лигайчва, Аллагьу Тааьлайи Чаз ибадат апlувалин кьяляхъ дишлади абйир-бабарихьна вуйи гьюрмат кlваин дапlна.
Веледариз аьгъяди ккунду: «Аллагьу Тааьлайин разивал абйир-бабарин разивалиъ а, Аллагьу Тааьлайин хъялра абйир-бабарин хъюлаъ а».
Саб ражари Пайгъамбарихьан ﷺ гьерху: «Аллагьу Тааьлайиз варитlан ккуни ляхин фу ву?» «Вахтниинди гъапIу гъудган», - гъабхьну жаваб. «Хъасин фу ву?», - гьерхнийи. «Абйир-бабариз мютlюгъ хьуб ва дурариз уж’вал апlуб».
Гъит Аллагьу Тааьлайи ухьуз хизандиъ мясляаьт уьбхюз, ужувлар хуз кюмек туври. Гележег акуб апlри.
Аьхириъ хъанара пуз ккундузузки, эгер жилар жиларси гъузиш, дишагьлийирра ужуб къайдайиъ шул – гьаму кIваинди гъибтну ккунду. ккунду. гьарсар жилижвуву. Хъа дишагьлийирира чпиин али гьякьарикан кlваълан гьаъну ккундар.
Гиран мапlнай, саризра гиран ктапlуз кlури гъибикlуб дариз, анжагъ ислягьвал ва ужувлан ккундузуз. Белки сарикьан му гафарикан фикир апlур, иншаАллагь.
