Табасаран ва Хив районариъ аьлимарин маджлисар

Инсанди фунуб вушра ужувлан ляхин апIуз ният гъапIган, дидкан мянфяаьт даршиди гъубзурдар. Имамари, аьлимари, мажлисар апIури, ихь халкьдиз аьхю мянфяаьт тувра. Ихь гъулариъ гъахурайи мажлисарин асас метлеб ва ккебгъруган апIурайи ният ихь халкьдин диндин рякъ яркьу апIуб, диндин кьувват заан дережайиз адапIуб, жигьил насил чIурубдихьан уьрхюб ву. Гьаддиз кми-кмиди жюрбежюр шагьрариъ-гъулариъ мажлисар кIули гъягъюру.

Ягъдигъ гъулаъ мажлис

18-пи мартдиъ Табасаран райондин Ягъдигъ гъулаъ, Гирами Калам кIваъланди аьгъю Йемендиан вуйи гьяфиз, шейх Ибрагьим аз-Зубажи ва райондин имам Ансар Рамазанов иштирак духьну, аьхю мажлис кIули гъубшну. Мажлисназ жюрбежюр гъулариан хайлин инсанар гъафнийи. Серенжем ачмиш апIури, райондин имамди гирами Каламдин заанваликан ва Рамазандин вазликан ктибтну.

Шейх Ибрагьим Зубайжийи чан улхбан асас пайнаъ Аллагьу Тааьлайи варитIан заанди дебккнайи Каламдикан мялумат тувну. «Гьюрматлу йиз ккуни гъардшар! Кми-кмиди ухьуз гирами Калам урхуз кIваълан гъябгъюру, бязи вахтари вазлик саб ражарикьан саспидари абццри шулдар, саспидари абццну саб цIар дубхну ккибкри шулу. Гирами Калам ухьуз варитIан заанди дебккнайиб ву. Гирами Каламди Гъиямат йигъан ухьхъан шагьидвал апIур» - къайд гъапIну шейхди. Дугъу гьацира вари уч духьнайидарихь чахъди ухьу гъудган апIруган урхру сура «аль-Фатигья» текрар апIуз гъитну.

Мажлис варидари сатIиди дюаь апIбиинди ккудубкIну.

Хив гъулаъ мажлис

Хив райондин Хив гъулаъ аьлимарин мажлис кIулиъ гъубшну. Мажлиснаъ Хив райондин имам Шябан Салихов, Йемендиан вуйи гирами Каламдин гьяфиз, шейх аз-Зубайжи ва Хив гъулан имам Мансур Везиров иштирак гъахьну.

Уч духьнайидарихьна илтIикIну Хив райондин имамди гирами Рамазандин вазлин заанваликан мялуматар тувну. Дупну ккундуки, Рамазандин ваз гьарсар мусурман касди заан дережайиинди ккадапIну ккуни ваз ву. Му вазлихьна ухьу заан гьюрмат айивал улупну ккунду. Хъа думу гьюрмат фициб дубхьну ккунду? Эгер ухьу варидари ухьуз улупнайи фарзар заан дережайиинди тамам апIури гъахьиш, гунгьарихьан ярхла шули гъахьиш – ари гьаму Рамазандин вазлихьна аьхю гьюрмат айивал шулу.

Шейх Зубайжийи чан улхбаъ инсанарихьна варитIан заанди гьапIнайи мюъжизат гирами Каламдикан ктибтну. Дугъу уч духьнайидарикан гирами вазлиъ асас пай Кьур’ан урхбаз, думу заан дережайиинди кIулиз адабгъбаз фикир тувуб ккун гъапIну.

Табасаран райондин имамарин собрание

Табасаран райондин Хючна гъулаъ имамарин собрание кIули гъубшну. Му серенжемдиз тамам вари гъулариан имамар, дурарин вакилар гъафнийи. Райондин имам Ансар Рамазановди, сабпи нубатнаан, вари имамариз чпи халкьдихъди гъабхурайи ляхнин чухсагъул къайд гъапIну.

Имамари чпин уч духьнайи суалар за гъапIну ва, гьарсаб суал фици кIулиз адабгъну ккундуш, мялумат тувну.

Ансар Рамаановди имамариз гьамусяаьт райондиъ айи жюрбежюр аьгьвалатарикан хабар тувну ва, гирами вазлин муддатнаъ асас вуди фицдар ляхнар кIулиз адагъну ккундуш, ктибтну.

Дупну ккундуки, гъи жигьиларихъди вуйи ляхин, школйириъ урхурайидарихъди вуйи ляхин райондиъ гъябгъюра ва думу ляхни ужуб бегьер тувбан бадали, гъулан имамарира чпиан удукьруси жафа дизигну ккунду.

Гьацира му серенжемдиъ дяъват отдели ва «Инсан» фондди гъабхурайи ляхникан яркьуди ктибтну.

Гъит Аллагьу Тааьлайи гьарсар имамдиз хъанара ужи лихуз кюмек туври! Амин!