МикIар хъайиган урхру дюаь
МикIарин терефназди фукIа чIуруб пуб карагьат ву, дици пувалиан аьжузвал арайиз гъюру, кIурира дупна. МикI хъайиган, дидкан айи мянфяаьтнакан ккун апIуру ва дидкан айи зарарнахьан уьрхюбра ккун апIуру.
Аьхю микIар хъайи вахтна Пайгъамбари ﷺ гьаму дюаь апIури гъахьну:
اَللَّهُمَّ اِنِّى أَسْأَلُكَ خَيْرَهَا وَخَيْرَ مَا فِيهَا وَخَيْرَ مَا أُرْسِلَتْ بِهِ وَأَعُوذُ بِكَ مِنْ شَرِّهَا وَشَرِّ مَا فِيهَا وَشَرِّ مَا اُرْسِلَتْ بِهِ
«Аллагьумма инни ас’алюка хайрагьа ва хайра ма фигьа ва хайра ма урсилат бигьи ва ауьзу бика мин шарригьа ва шарри ма фигьа ва шарри ма урсилат бигьи»
Мяна: «Я Аллагь, узу Увкан гьаму микIарин уж’вал - гьамдиъ айи уж’вал ва, му фу бадали гьапIнаш, дидин уж’вал ккун апIураза. Узу Увкан гьаму микIарин зарарнахьан - дидиъ айи заранахьан ва, думу фу бадали гьапIнаш, дидин зарарнахьан уьрхюб ккун апIураза».
Эгер мархьар гизаф ургъувалиан зарар аш, Аллагьу Тааьлайикан думу зарарнахьан, читинвалихьан уьрхюб ккун апIуб ужи ву. Дицдар дюшюшариъ Пайгъамбари ﷺ гьамциб дюаь апIури гъахьну:
اللهُمَّ حَوَالَيْنَا وَلاَ عَلَيْنا, اللهُمَّ على اْلآكامِ وَالظِّرابِ وَبُطُونِ الْأوْدِيَةِ وَمَنَابِتِ الشَّجَر
«Аллагьумма гьявалайна ва ла аьлайна. Аллагьумма аьлаль аками ваззираби ва бутIуниль авдияти ва манабити шшажари».
Мяна: «Я Аллагь! Гъит мархь дагъдиинди, тепйириинди, дерейизди ва гьарар шлу йишваризди убгъри».
