Футнакрарин жергйириан махьан
Футнакрарин жергйириан махьан
Заманйир, уьмрар гьарган сабстар вуди шулдар. Халкьдин арайиъ аьдалатра гьаммишан саб вуди гъубзурдар. Амма гьамусдин вахтна пагь фукьан артухъ дубхьнадарин футна! Фукьан чиб-чпилан улхуб, мирас-варисдилан улхуб ва, варитlан чlуруб - аьхю аьлимариланра кмиди футнйир апlуб артухъ дубхьнадаринхъа!
Ав, футна адарди саб вахтнара гъабхьундар. Амма аьлимарилан, имамарилан, диндин улихь хьайидарилан футнийир апlури, гъийин йигъанси жямяаьтдиз хатIалуди ва зарар ади сабанра гъабхьундаршул.
Пайгъамбарин ﷺ гьядисдиъ дупна: «Аьлимар пайгъамбрарин ирс-агьлар ву».
Гьаму гьядисдиз асас духьну, ухьу шлубкьан илимлу агьлариз, аьлимариз гьюрмат апlури духьну ккунду.
Аьхю аьлимарира, имбу инсанарира гьарури, Аллагьу Тааьлайихьан гучl хьади, чпи кlурайи гаф ва апlурайи ляхин шариаьтдин терезариин иливури духьну ккунду. Аьдати касди аьлимарин терефназди фукIара саб гаф пуз ният апlруган, гизаф фикир дапlну ккунду.
Иблисдиз аьдати кас чlуру ляхнихъ хъауз лап рягьятди ву, хъа аьлим кас - ваъ. Гьаз гъапиш аьлимдиз ужубна харжиб жара апlуз аьгъя.
Думутlанна гъайри, ихь гъул-жямяаьтдиъ инсан кечмиш гъахьиган, ясана жара гьацдар дюшюшар арайиз гъафиган, му ляхнарин улихь аьлим, ясана имам шулу.
Гизафдари, зарафат вуйич кlури, кялхъбан гафарра апlуру, мелзниина гъафиб фу вушра кlуру. Дици дубхьну ккундар. Гьаз ухьу Гъиямат йигъаз жвуваз душмнар уч апlура? Аьлимарилан имид ибшри, аьдати инсанариланкьан дулхну ккундар.
Ихь аьхю абйирин вахтари мукьадар пис ляхнар ади гъахьундар. Саб кlуруб, аьхюр-бицlир гюзлемиш апIури гъахьну, кьюб кlуруб, имамдихьна, аьлимдихьна аьхю гьюрмат ади гъабхьну.
Эгер сар касди тмунурилан улхуруш, багахь хьайири думу улхбакан Аллагьу Тааьлайин улихь айи зарарнакан дупну ккунду. Хъа зарарнакан ктибтбан бадали жвуваз сацlибкьан Ислам диндиканра аьгъяди ккунду.
«Илим аьгъю апlувал гьарсар касдиин али фарз ву», - гьамци дупна гьядисдиъ. Жвуван гъудган батlил апlру ляхнар, гъудгнин жикlувалин фарзар ва гьацира жара фарз ва суннат ляхнар гьарсариз аьгъяди ккунду.
Илим аьгъю дапlну ккудубкlуз шлуб дар. Илим артухъ аьгъю апlбахъ, жвуван иманра артухъ шул ва, гьаддихъди сабси, Аллагьу Тааьлайихьан гучl айивалра артухъ шулу. Аллагьу Тааьлайин улихь аьлимарин аьхю дережа а, гьаддиз Пайгъамбари ﷺ чан гьядисдиъ, аьлимар пайгъамбрарин ирс-агьлар ву, гъапну.
Эгер гъийин йигъазкьан ихь мелзналан гьацдар чlуру гафар улдучlвнуш, туба дапlну, гьаму йигъланмина сарун мициб чlуру ляхин сарун апlидарза дупну, ижми ният дапlну ккунду.
