Машквар мубарак ибшри!
Дагъустандин муфтий, республикайин аьлимарин Советдин председатель шейх Аьгьмад-афандийи гирами машкврахъди тебрик апlура.
«Ассаламу алейкум ва рагьматуллагьи ва баракатугь!
Гьюрматлу гъардшар ва чйир!
Учву вари кlваантlан гирами машкврахъди тебрик апlураза!
Гьаму вари Рамазандин вазлин муддатнаъ инсанари ушв дибисну, жямяаьтдихъди гъудгнар апlури, Аллагьу Тааьлайикан диндин гъардшар ва чйир кьаза-балйирихьан, бедбахтваларихьан, чlуруваларихьан уьрхюб ккун апlури, садакьйир туври, хялар ушв гьибтуз кьабул апlури ва чпира хяларди гъягъюри, мусурмнарин арайиъ сабвал мюгькам апIуз чалишмиш шули гъахьну.
Рамазан хасият уткан апlуз чалишмиш шлу ва рягьимлувалин ваз ву. Ухьу му ваз Аллагьу Тааьлайи ихь гунгьарин аьфв гъапlну шул кlури, ужувлан ляхнариз Аллагьу Тааьлайин кюмекнак умуд кади гьапlрахьа. Дугъриданна Аллагьдиина ﷻ таваккал апlрудариз Думу чlяаьн ву!
Гъит Аллагьу Тааьлайи ихь гъидису ушвар, гъапlу ибадат кьабул апlри. Гьаму вазли ухьу гъазанмиш гъапlу ужувлар ихь уьмрин аьхиризкьан ухьуз текрар апlуз амур апlри. Гьарсар касдиз Аллагьу Тааьлайин разивал ибшри. Амин!»
