Хяларихьна эдебнан гьякьнаан
Хяларихьна эдебнан гьякьнаан
Гьарсаб хизандиз хялар шулу ва хяларихьна аьхю гьюрматра ади шулу. Думу заан ва Аллагьу Тааьла рази шлу ляхнарикан ву. Гьаци вуйиган, хялижвувахьна вуйи бязи эдебарикан мялумат тувдихьа.
Хулан эйсийи наан учв дитнуш, гьадушвахь дусуб хялижвуваз лайикь ву. Чан хулан гьял эйсийиз ужуйи аьгъя.
Хялижв 4 ляхин уьрхюб важиблу ву:
- 1. Чаз улупу йишв’ин дусуб.
- Жвуван улихьна гъабхибдиин рази хьуб.
- Хулан эйсийин ихтияр дарди гъудудужвуб.
- Удучlвган эйсийиз дюаь апlуб.
Сар касдин хул’ан удучlвган, Пайгъамбари ﷺ гъапну: «Ушв дибиснайидари учвухь ушв гьибтри, ичв хурагнакан ужудари ипlри, малаикари учв’ина рягьмат алапIри, учв’ина рягьмат гъюри».
Хялари, шидна-кьилтlан гъайри, чпин улихьна фукIа жараб хуб тlалаб дарапlур. Хурагназ аьйиб дарапlди, жвуван улихь дивуб дипlну, «гьямд» дапlну ккун. Суфрайихъ яшнан аьхюр хъайи вахтна, яшлуритlан ухди ипlуз хъюгъюб ужу дар. Мисалиъра дупнадаринхъа: «Улихь хьуб - падишагьдиз, ккергъуб - йисарин аьхюриз». Жвуваз адрубдин жафайиъ учlвуб, айибдиз хаинвал дапlну, хялижвуван улихьна дархуб ужи дар. Мидихъди сабси, чан хизан мягьрум дапlну, айиб хялижвуваз харж апlубра ихтияр айиб дар.
Хялар цlибди гъахьиган, дурарихъди суфрайихъ дусну ашра, дурариз гъуллугъ апlуб ужи ву. Уьлихъ дусган, лап гуж дарапlди, амма хялижвуваз «ипlин» кlури пубра, ужи ву. Хяларин багахь ккебехъну дусну ккундар, ясана дурар гъитну удучlвну гъягъюз хай шулдар. Хяларихъди маш ачухъди дубхьну ккун. Ипlруб дипIну ккудубкlну, хялариз алдабгъуз ккун гъабхьиган, дурар дерккубра ужи дар.
Гьамцдар эдебар, хялижвувахьна духьну ккуни гьякьар а.
Гьаци апIури, ихь Пайгъамбарин ﷺ рякъ гъибисиш, аьхю мянфяаьт а. Гьарсаб ляхнин чан къайда а, ва хялижвув кьабул апlбан кьайдара ухьуз ихь диндиъ улупна. Фицир кас вушра, жвуван хулазди учвlнуш, дугъахьна заан гьюрмат улупну ккунду.
Жвуван хулаъ айи ипlрубдикан тувну, бизар духьнаш, эрг’вал йивуз гъитну ккун. Хялижвуваз мициб гьюрмат улупуб аьхю саваб айи ляхин ву.
Хялижвувахъди хулаз берекетра гъюр. Уву яв хиларилантина садакьа тувган, гьаддихъди сабси яв ризкьра артухъ шулу.
Гъит Аллагьу Тааьлайи ухьу хяларихьна гьюрмат уьбхру агьларикан апlри! Амин!
