Сабур апlин, эй инсан
Му дюньяйиъ
вари бихъур,
сар абана
баб ктарди,
уж’вал апlин дурариз
аку дюньяйиъ имиди.
Дерд-хажалат
дурарик каш,
саб ширин гаф
сюгьбат апlин.
Артухъ увуз
дурар ккундуш,
гарцlил кивну
саб мак апlин.
Уву аьхю апlури,
дурар гьарган
увухъ гъахьну,
гьамус дурар
яшлу духьну,
аьжуз, ялгъуз
уьмриъ ахъна.
Гъалатl духьну
му дюньяйиъ,
абин-бабан
хайир гъибтиш,
язухъ вуйкlан
яв аьхириъ,
дурар уву
кlваълан гьаиш.
Ургну ава
ярхла вуйи уьлкйириъ,
багъри вуйи
йиз бай вува гирами,
баб вуза яв
кlваин апlин бицlи вахт,
хъуркь узухьна
гирами бай, гирами.
Юкlв чlюбкьюра
гъамлу вуйи фикрари,
дерд-хажалат
жандиъ ади йигъ-йишвди,
улар ацlну айиз
ишбу нивгъари,
хъуркь узухьна
гирами бай, гирами.
Жандиъ аман имдар
аьхир шулайиз,
уву рякъюз ккунди
юкlв убгура йиз,
гирами бай увуз
миннат дад вуйиз,
хъуркь узухьна
гирами бай, гирами.
Дюньяйиъ а
гизаф девлет,
дидихъ уву
ул михъиван,
дюньяйиъ а
гизаф шадвал,
дидин кьяляхъ
хъа пашманвал.
Шаклу фикрариъ ахъну,
аькси махьан
му ихь диндиз,
ижми иман
яв кlваъ бисну,
ибадатвал
апlин уьмриъ.
Фтихъ вушра
юкlв михъибан,
инсаф адру
нефс бадали,
сабур апlин
гьарсаб ляхниъ,
Аллагь кlваин апlин.
Абур, сабур
гъир’ят ади,
гьюрмат, беркет
хулаъ ади,
уьмур хъапl
лайикь вуйиси.
Аллагьдик яв
умуд кади.
Дурубшри уьмур пашманди
Дерд-хажалат жандиъ ади.
Хъебехъ дуст кас
фикир апlин
саб арайиъ,
му аку дюнья
гьич саринубкьан дар
гьарсар инсандин
гъибди чан аьхир,
дидкан ужуйи
вардиз ву мялум.
Женнет багъси
дабалгнава багъ-бистан,
хуб гюрчегди
дабалгнава хал-диван,
жандиъ айиган
архаин гьевес шадвал,
наънан-вуш хъубкьур
саб дерднан хабар.
Гьапlхьа, дуст кас
му фана дюнья ву,
саб йишваъ аш
йивури гарччил шадвал,
саб йишваъ шул
ишури дерднан салам,
гъакlир кивну,
имбудари хъана
хъюгъюр хъапlуз хъана шадвал.
Сар ялгъузди вуза
кlури дюньяйиъ,
хажалатнан фикрар
апlуз хай даршул,
шюкюр ибшри
ихь Аллагьдиз кьудратлу,
йигъди-йишвди
ухьуз савабар Тувруриз.
Фикир мапlан
дустар адарзуз кlури,
дустар гьарган
сар сарихьди
гъузрудар дар,
умуд яв каш
дустарикан дихъур сар,
читин йигъан
яв дердназ шулур дарман.
Уву нагахь инжиг
гъапlиш жарари,
гьялак махьан
хайир гъибтуз фагъирин,
чав швумал шул
фикир дапlну аьхириъ,
дюзди дарпи
гъягъи аьсси гафарин.
Инсанарин айи
дюзвал дюньяйиъ
дугъри вуйи касари
дебккнайиб ву,
кучlал кайи
гизафдарин фикрартlан,
саб дюзи гаф
дугъри касдин заан ву.
