Бабан гьарай

Бабан гьарай

Суал: Ассаламу алейкум, гьюрматлу газатдин гъуллугъчйир! «Ассалам» газат урхури, жвуваз аьгъдруб дубгъури шулза. Учву гъабхурайи ляхниз кlваантlан аьхю чухсагъул кlураза. Гъит Аллагьу Тааьла учвкан рази ишричвкан. Гьамциб суалназ жаваб тувайчва: Узу гьарган хулаъ айир вуза, саб ляхин адарди гьяятдианкьан удучlвурдарза, хъа гъуншйир уч шули хябяхъган гагь му гъуншдилан, гагьсан тмунурилан улхури шулу. Узу чпихъди дугъужвурдар кlури, узлан футнйир апlуру. Саб кьадар сабур апlури гъахьунза, хъа гьамус шули имдар. Дурарихъди аьлакьйир чlур апlузра ккундарзуз. Гьаму дюшюшдиъ саб сабурнан гаф йипайчва. Фици гъапlиш, ужи шул?

Жаваб: Ваалейкум ассалам! Саб кlуруб, уву футнайин ляхнариъ иштирак даршлуб - му заан ва ужувлан ляхнарикан ву. Гъуншйирин гьякьнаан кlуруш, уву дидкан асиллагь фикир мапlан. Дициб аьгьвалат саки вари йишвариъ ва кми-кмиди алабхъурайиб ву, ва дурари увлан фици улхураш, имбудариланра гьаци улхура. Гьар ражари дурари увлан футна гъапlубкьан, дурари Аьхиратдиъ яв чlуру ляхнар чпиз дисиди, эгер гьаму жилиин илмиди туба дапIну, аьфв ккун дарапlиш.

Ав, гъулан айитl увлан футна апlруган, улхруган, дерд дархьиди даршул. Дициб читин гьялнаъ айиган, Пайгъамбарин ﷺ уьмрикан кlваин апlин, фици дугълан улхури гъахьнуш, фици дугъаз зарар туври гъахьнуш. Пайгъамбарин ﷺ тарихдикан улхруган, ихь уьмриъ читин вахтна ухьуз лап рягьят шулу.

Гьич сабанра фикир мапlанки, уву сар читин гьялнаъ а, кIури, хъа имбударин варидарин ужи ву, кlури. Ваъ, дици дар. Гьарсар касдиз Аллагьу Тааьлайи жюрбежюр имтигьнар тувра ва ухьу сабур апlури духьну ккунду.

Думутlанна гъайри, эгер гьаму жилиин яшамиш шулайи бицlи вахтна ухьу сабур гъапlиш, Аьхиратдиъ гьарсаб чlурувалихъан дурари жаваб тувди.

Гъи футна артухъ дубхьнайи вахт ву, хъа саспидариз гьадму футна апlру касарихъди дуствал апlузра ккун шула. Гьаз гъапиш футнакрариз жюрбежюр хабрарра гизаф ади шулу.

Хъа футнакрарин аьхир саб ву – Аьхиратнаъ чlуру аьзаб. Гьаддиз шулуш дурариз насигьятнан гаф дапlну ккунду, эгер дициб гаф гъадабгъурдарш, жвувкьан думу чlуру ляхниъ иштирак духьну ккундар.

Футна апlувал Аллагьу Тааьлайи гирами Каламдиъ ва Пайгъамбари ﷺ чан гьядисариъ гъадагъа дапlнайи чIурударикан саб ву. Футнакрариз женнетдин ниъкьан кубкlидар, дупна.