Эгер риш жарарихъди гьергну гъушиш…
Эгер риш жарарихъди гьергну гъушиш…
Мусурман риш жара балихъди, гьадгъаз хпирди гъягъюз ният ади, гьерхну гъушиш, дугъаз фициб аьзаб а? Мицдар дюшюшар дархьбан бадали, фу дапlну ккунду?
Му дюшюшди аьзаб абизна бабаз дубхьну ккунду. Дурариз суал: Гьаз шуру гьамциб ляхин апlрубсиб тербия тувунчва?! Эгер гьарсар абиз-бабаз Аллагьу Тааьлайин улихь жвуван веледарихъан айи жавабдарваликан аьгъяйиш ва дурари му ляхниз фикир туври гъахьнийиш, абайин хул’ан жарарихъди гьергну гъягъру, ясана гьацдар жара дюшюшар гьичра шулдайи. Веледарин тербияйиз асас фикир тувну ккунду.
Пайгъамбарин ﷺ гьядисдиъ дупна: «Учвкан гьарур габан ву ва гьарсар чан хиликк ккайидарихъан жавабдар ву» (имам Бухари).
Риш арайиз адаувал уткан палат алабхьбиинди, ясана тухъди фун абцlбиинди ккудубкlурадар, мушваъ асас фикир тербияйиз тувну ккун.
Сабпи нубатнаан жилири Ислам диндин заан дережайин тIалабарикан чан хпириз кидибтну ккунду, хъа хпири, чан нубатнаан, шураз утканди, гъаври шлуганси мялумат тувну ккун.
Му къайдайиинди хизандиъ аьлакьйир адарш, шураз думу тербия тувуз читинди шул, ва гьамцдар дюшюшарра арайиз гъюр.
Аби-бабу сабсан ляхниз фикр тувну ккунду – вахтниинди риш швуваз тувуб.
Пайгъамбарин ﷺ гьядисдиъ дупна: «Эгер увухьна гъафи касдин имандиин учву разиди вуш, дурар никягь апlбиинди сатlи апlинай; учву дици дарапlиш, жилиин футна шул…» (Тирмизи).
Ав, аба-бабхьан гъийин заманайиъ веледарихъди аьлакьалу вари ляхнариз фикир тувузра даршул, амма шлубкьан жвуван терефнаан тербия тувуз чалишмиш духьну ккунду.
Гъит Аллагьу Тааьла гьарсар абизна бабаз ихь диндиъ улупнайиганси жвуван веледариз тербия тувуз кюмек ишри.
