Мизан ихь ляхран ерцру терезар ву
Мизан ихь ляхран ерцру терезар ву
Гъиямат йигъан му жилиин гъахьи вари ляхнар мизан кIуру терезариин хьиди, гьятта фикриз гъадрагъуз даршлу бицIи ляхнарра кмиди. Ужударра, харжидарра - вари ляхнар мизантерезариин илирчиди.
Терезари наанди гъагъиди улупуруш, гьадму фикиркьан тутруврайи саб бицlи я ужуб, я харжи ляхнилан асиллу хьуз мумкин ву. Гьаддиз Ислам диндиъ улупнайи гьарсаб къайдайиз дикъатни-инди фикир тувну ккунду, гьеле дурар лап бицlидар вушра. Абу Давудди Гьясандихьан ктибтура-ки, саб ражари Аьйшайин уларилан нивгъар гъушу, думуган Пайгъамбари ﷺ гьерху: «Гьаз ишу-рава?» Дугъу жаваб туву; «Йиз Цlа кlваин гъабхьнийиз. Гъиямат йигъан жвуван багахьлуйир кlваин шуйкlан?».
Пайгъамбари ﷺ гъапну: «Шубуб йишвахь сарира тмунурикан фикир апlидар: мизан-терезарин багахь, фуну тереф гъагъиди шулуш аьгъю дархьидикьан гагьди; гьарурихьна чан ляхнар кайи дафтар тувруган, гьеле думу дафтар арччул терефнахъанди, дарш гагул терефнахъанди тувруш аьгъю дархьидикьан гагьди ва жегьеннемдилантина илипнайи Гъядухъ, гьеле душвлан ул-дучlвуруш-улдучlвурдарш аьгъю дархьикьан гагьди». Харжи ляхнартlан ужудар ляхнар артухъ гъахьиган, жвуван ляхнар кайи дафтрар арччул ва улхьан терефариан тувур, ва дурарин ччвурар ктухури женнетдиъ хьидичва кlури, шаду хабар гъибди. Дурар жегьеннемдиъ хьидар. Хъа чпин гунгьарихъан вуйи аьзаб дурари накьвдиъ, Гъиямат йигъан ва Сиратl гъадлан улдучlвруган гъадабгъиди. Хъа шлин ужудар ляхнартlан харжи ляхнар артухъди вуш, ляхнар кайи китаб кья-ляхъ ваг агул терефнаан рубкьиди, дураринра ччвурар кlури, жегьеннемдиз гьаъди. Анас асгьябдихьан дуфна: «Гъиямат йигъан Адамдин веледарикан сар хъади дуфну, Терезарин арайиъ дитру, ва дугъан багахь малаик дугъужвиди.
Эгер думу касдин харжидартlан ужувлан ляхнар артухъ вуди гъахьиш, малаикди варидариз ебхьру сесниинди кlуру: «Фулану касдиз шадвал гъабхьну, ва мидин кьяляхъ сарун хажалатвал шулдар!» Хъа эгер чlуру ляхнар артухъ гъахьиш, думуган малаикди варидариз ебхьруганси кlуру: «Фулану касдиз пашманвал гъабхьну, мидин кьяляхъ сарун шадвал хътар!» Читин ва жаваб тувру вахтар улуркьиди гьарсарин кIул`ина, гьаддиз му жилиин ужувлан ляхнар апlуз мумкинвал ими-ди, гъачай гьялак хьухьа. Жандиъ кьувват имдруган, ужувлан ляхнар апlуз мумкинвал цlибтlан имдруган гъажаргъну кlури, сарун кьан хьузра мумкин ву. Гьюрмат апlинай яшлуйириз, рягьим-лувалулупай бицlидарихьна ва думуган вари ляхнар ужи хьиди, ин ша Аллагь.
АЬДИЛ МУРАДОВ
