Уьмриъ аьхиримжи 5 гъудган

Уьмриъ аьхиримжи 5 гъудган

Гьар гвачIнинган нивкI’ан уягъ гъаширин, гьаму йигъ му жилиин йиз аьхиримжи йигъ шул кIури, фикир шулиз. Фици му йигъ узу адапIиш, гьаддилан асиллу шул йиз аьхиратра, кIури фикрар апIури шулза.

ГвачIниндин гъудган йиз бицIивахтарихъри теври шулза. Думу гъудган лапра Аллагьу Тааьла кIваъ ади апIуз чалишмиш шулза, гьаз гъапиш узуз гъи суткайиъ айиб 5 гъудган ву, эгер кIваантIан тамам дарапIиш, фукIара дарди гъузразу. ГвачIнинган уьл дипIну ляхниз гъягъюри шулза, ва ляхинра кIуруш, жвувахъди лихурайидариз гьюрмат ади, дурарихъди ужудар аьлакьйир уьрхюри, марцциди, кIваантIан апIуз чалишмиш шулза. Гафар цIиб дапIну, ляхнихъди сабси, Аллагьра ﷻ кIваъ ади хьуб, пайгъамбрарикан фикрар апIури хьуб – му гизаф берекет айи ляхин ву.

Лисундин гъудган улубкьбахъди, йиз жигьилвалра улубкьуру. Думу вахт йигъандин гьацI вуди шлубкьан артухъ ужувлан ляхнар апIуз чалишмиш шлуб ву. Гьаддиз узу Аллагьу Тааьла бадали ужудар ляхнар апIуз чалишмиш шулза.

Гьарквандин гъудгнихъди магьа гьацI уьмур ккудубшну ва мидхъан жаваб тувну ккунивал кIваин шулу. Гьаддиз ибадат апIуз чалишмиш хьувал артухъ шулу, ужувлан ляхнарин гъагъ артухъ апIуз ккун шулу.

Ригъ алабхъган, лавландин гъудгнин вахт улубкьура. Магьа уьмурра чан аьхирихъна гъюра, имбуб саб фарз гъудган ву. Му вари ккудубшубдин натижа адабгъру вахт ву. Йиз гъийин гъубшу йигъ кIваин шула, ва ктучIву гунгьарихъан, ужудар дару ляхнарихъан туба апIураза. Му йигъандин вахтна узу цIибтIан ужувлан ляхнар дарапIувалин гъаври шулаза.

Магьа хъитIирхбандин гъудгнин вахт улубкьу, му йигъандин варитIан аьхиримжи гъудган ву, хъа белки - йиз уьмриъра. Узуз имбуб фукIара дар… Гъудгнихъан нивкIуз гъягъюзра гьялак шулу. Узу гъапIу ляхнин натижйир адагъну, туба апIуз сяътар, дакьикьйир гьуркIрадарзуз.

Магьа нивкIуз гъягъру вахт улубкьну – му йиз уьмрин аьхир ву. Узу думу фици адапIнийкIан? Аллагьу Тааьлайин рягьимлувал, разивал шуйкIан? Сарун узу гъапIубдихьна фукIара я аьлава апIуз, я дидкан кам аIуз шуладар. Вахт дугъубжвну…

Амма Аллагьу Тааьлайи узуз Чан рягьимлувал улупну ва хъанара цIийи йигъ тувну, сабсана йиз уьмур ужувлахъинди илтIибкIуз мумкинва тувну. Магьа нивк’ан уягъ гъахьунзу, хъа мумкин вуйи уягъ дархьузра. ЦIийи йигъ тувну ва ният апIураза вари йигъ, ужувлар апIури, кюмекар апIури, Аллагьу Тааьлайин разивал абгури адапIуз.

Гьюрматлу ватанагьлийир! Саспи вахтари ухьу, кечмиш хьувал хабарсузди гъюруб кIваълан гьапIну, лап аьхю планар диври шулхьа. Ккун апIураза, йигъандин муддатнаъ сакьюдар ражарикьан кечмиш хьуваликан фикир апIуб.