Ихь халкьдин тарихдиъ сабпи ражари…
Ихь халкьдин тарихдиъ сабпи ражари…
Дада, хпир, чи, дишагьли - саб гафниинди, мусурман чйир! Гьамшваъ ухьу ктуху гьарсаб гафнаъ аьхю мяна а. Жилиин инсанар яшамиш хьуз хъюгъхъанмина дишагьлийири му жилиин аьхю роль гъабхура.
Жиларинна дишагьлийирин аьхю фаркьвал а. Хизандин айитI, хулан айитI дишагьлийири апIурайикьан ляхнар жиларихьан гьичра апIуз шлуб дар.
Гьаци вуйиган, дишагьлийириз жаради вуйи маджлис апIбан мурад-метлебра гьадму вуки, гъит дураризра сацIибкьан чпин веледарихъди сатIиди дусну, уткан нашидарихъ, вязйирихъ хъпехъури, чпин эрг’вал адабгъри.
Магьа 28-пи сентябри Дербент шагьрин «Дербент» кIуру залиъ дишагьлийириз вуйи «Табасарандин дагълуйир» ччвур али нашидарин вечер гъубхну. Думу мажлис табасаран райондин имам Ансар Рамазановди тешкил дапIнайиб вуйи.
Мажлисназ Табасаран ва Хив районариан, Дербент ва Огни шагьрариан, гьацира багарихь хьайи гъулариан дишагьлийир уч гъахьнийи.
Мажлис ачмиш апIури, Ансар Рамазановди, сабпи нубатнаан, вари уч духьнайидар улубкьнайи гирами вазлихъди тебрик гъапIну ва дурариз, Пайгъамбарин ﷺ вахтари дишагьлийири фициб роль гъабхури гъахьнуш, ктибтну.
Уч духьнайидарин улихь удучIвну Хазар гъулан имам Кьурбан Рамазановра гъулхну. Дугъу ихь ккуни Пайгъамбарин ﷺ уьмур кIваин гъапIну ва фицдар ниъматар Аллагьу Тааьлайи ухьуз кьисмат дапIнаш, кIваин гъапIну.
Хъасин тамамди му мажлис дишагьлийирин хилиъ гъабхьну. Чиб-чпиз насигьятар туври, назмар-нашидар, зикрар урхури гъахьну, хъа улхбарин арайиъ жюрбежюр пешкешар пай гъапIну.
Дугъриданна, мициб дишагьлийирин мажлис ихь тарихдиъ гъабхьиб дар, мидин гьякьнаан Муфтиятдин Кьибла терефнаъ айи дишагьлийирин дяаьват отделин регьбер Мягьяббат Рамазановайира гъапну. Хъа Табасаран райондин дишагьлийирин дяаьват отделин регьбер Фатима Аьлиевайи варидариз аьхю чухсагъул гъапну.
«Дугъриданна, му ужувлан мажлиснаъ ухьу иштирак хьуб заан ляхнарикан ву. Пайгъамбар ﷺ кIваин дапIну ухьу гьарсари алдабгъу лик женнетдиъ айиб ибшри», къайд гъапIну Фатима Аьлиевайи.
Мажлиснан аьхириъ ГьепIил гъул’ан вуйи Султанат халайи вари дюн’яйиъ ислягьвал хьуз, ихь веледар сагъ-саламатди кьяляхъ гъюз, табасаран халкь гьарган ужуб рякъюъ хьуз дюаь гъапIну.
Магьа гьамци утканди, заан дережайиинди ихь халкьдин тарихдиъ сабпи ражари гъабхьи дишагьлийирин мажлис кIули гъубшну.
Варидариз чухсагъул, Аллагь ﷻ рази ишри! Амин!
