«Ассалам» газат гьарурин хулаз
«Ассалам» газат гьарурин хулаз
Аьзиз ватанагьлийир! Аллагьу Тааьлайи, ухьу му жилиина ибадат апIуз кIури халкь дапIнайидар вуйиз, дупна. Ибадат гъапиган, Чав гьаспикк ккаъри, Чав улупу ужувлан ляхнар апIури ва Чав ярхла йихьай дупнайи чIуру ляхнарихьан ярхла хьуб ву. Гьамциб уьмур хъапIри гъахьиш, ухьу ибадат апIру агьларикан шула.
Хъа думу ляхнарикан ухьуз аьгъдруган, гьялал-гьярам жара апIуз аьгъдруган ихь гьял фициб хьибдихъа?!
Сабпи нубатнаан ухьу шариаьтдиъ фу гьялал вуш, хъа фу гьярам вуш, якьинди аьгъю дапIну ккунду. Гьяйифки, варидариз думу ляхнар аьгъю апIбан бадали, медресйириъ урхуз мумкинвал адар, гьаддиз ухьу шлубкьан ихь чIалниинди вуйи, ясана жара ухьу гъаври ахъру чIалариинди вуйи диндин литература, газатар-журналар дурхну ккунду.
Амма дурар урхруганра ухьуз гьадму литература гьякьлуб вуш-дарш аьгъяди ккунду. Саспи китабар, гьяйифки, диндихьан ярхла вуйидари дикIуру ва бикIурайибра чпи диндин гъаври айиганси бикIруб шулу, хъа дици дубхьну ккундар.
Гьаму ляхнар вари фикриз гъадагъган, ихь ватанагьлийириз «Ассалам» газатдиз подписка апIуб ккун апIури шулхьа. Гьаз гъапиш, му ихь аьлимари бикIурайиб ву ва мушваъ анжагъ вари терефариан якьинди ахтармиш дапIнайи ляхнарикантIан бикIурадар.
ДумутIанна гъайри, учву подписка дапIну туврайи пул медрессейиъ урхурайи тялимариз гъябгъюра, хъа думу аьхю садакьаси гьисаб шула. Мидизра дикъатниинди фикир тувай. Яни увуз мяняфаьт ктабгъуз, илимдикан аьгъю апIуз газатра шула, увлантина тялимариз садакьара шула. Йиз фикриан сацIибкьан диндикан хабар айи касди мициб мумкинвал ккадапIидар.
«Илим урхувал гьарсар мусурман касдиин али фарз ву», - гьамци дупнайи Пайгъамбарин гьядисдиъ. Яни ухьу гъаври шлуганси, гьарсар мусурман вуза кIуру касдиз ихь Ислам диндиан вуйи аьгъювалар ади ккунду. Ухьуз фици гъудган апIувал, ушв бисувал, закат тувувал, гьяж апIувал фарзар вуш, ари илим урхувалра гьаци фарз ву. Гьаз гъапиш илим адруган, инсандиз чав гьапIруш аьгъдар, дугъан уьмриъ гьялална-гьярам гьарган кибикьну шулу, ипIрубра гьярам хьуз мумкин ву ва гъапIу гъазанжра гьярамдикан хьуз мумкин ву. Гьамци дархьбан бадали Аллагьу Тааьлайи ухьухьна гирами Калам гьапIну, ухьуз варитIан заанди дерккнайи пайгъамбар тувну, хъа эгер му ляхнариз ухьу гъи фикир тутрувиш, Аьхиратдиъ ухьуз читинди хьибди.
Гьаддиз, гьюрматлу ватанагьлийир, учвкан ккун апIурача, «Ассалам» газатдиз подписка апIинай, аьгъювалар гъадагъай.
«Ассалам» газат учвуз му ужувлан ляхнариъ аьхю кюмек ву.
Учвуз хул’ан удучIвуб гереккьан шулдар, гьаз гъапиш гьарсаб гъулаз, гьарсаб хулаз газатдин вакилар гъюра, подписка гьадрарихь апIинай.
Аллагь ﷻ кюмек ишри варидавриз! Амин!
