Мединайиз рякъюъ
Вуйи къур йис,
Ипlруб ву кьит,
Саб хурма пай
Шуйи кьюриз.
Штун гьякьнаан
Вуйи читин,
Гьаригъ гъяйи
Кlажар дитlну,
Гизафдарин
Кlвантlар дяргъна.
Ихь Пайгъамбри
(Салават ва
Салам дугъаз)
Аллагьдикан
Ккун апlура
Мархь убгъувал.
Дюаь кьабул
Гъапlу лукlран.
Миржидпи йигъ.
Хиджрайихьна
Хъуркьу мурар.
Ихь Пайгъамбри
(Салават ва
Салам дугъаз)
Гьялак гъапlу
Вари кьушмар.
Мушван халкьдиз,
Пис вуйиган,
Тувну жаза
Сар Аллагьди.
«Табукдихьна
Багахь шулу
Закур ухьу
Сар Аллагьдин
Амриинди, -
Кlур Пайгъамбри
(Салават ва
Салам дугъаз) –
Лигай, кьушмар,
Зу дарпиди
Мукучанай
Му гъуйдин штук.
Шид ву лап кьит».
Ва хъуркьиган
Дина, дишла
Ихь Пайгъамбри
(Салават ва
Салам дугъаз)
Машар-хилар
Гъижикlнийи,
Кьяляхъ убзу.
Хъасин гъафи
Шид хъудрубтlди.
Вардиз гьубкlу.
***
Бина гъиву
Мусурмнари
Му булагъдихъ.
Аьгъю дубхьну,
Душмнин кьушмар,
Гукlни духьну,
Кьяляхъ гъушну.
Къад йигъ гъахьну
Ихь Пайгъамбрин
(Салават ва
Салам дугъаз)
Гьаму йишвахь.
Айла, Джарба
Шагьрариан,
Азрухдиан
Гъафну мина
Гьюкумдрар. Ва
Мясляаьтнан,
Ислягьвалин
Гъапlу йикьрар.
Хъа кlажарик
Йикьрар апlбан
Дибикlнайи:
«Кьудратлу вуй
Сар Аллагьдин
Ву ччвурнахъан,
Учву уьрхюз
Шулу далда
Сар Аллагьди
Гьаъну айи
Пайгъамбрихьан…»
***
Къад йигъ гъубшган,
Ихь Пайгъамбар
(Салават ва
Салам дугъаз)
Кьяляхъ хътаку.
Хайлин гъушган,
Дябкъну Ухуд,
Гъапи дугъу:
«Ухьу ккуни
Дагъ ву гьа му,
Ухьуз ккуниб
Вухьуз думу».
Удучlвнайи
Кючйиригъна
Дишагьлийир
Ва бицlидар.
Шад мяълийир
Апlурайи:
«Бегьемди ваз
Удубчlвну а,
Ухьуз вардиз
Саният аль-
Вадайси ву,
Ватан ачухъ
Гъапlу ахсрар».
Улубкьнайи
Рамазан ваз,
Мистан багахь
Ккилигура
Гъудган апlуз
Пайгъамбрихъди
(Салават ва
Салам дугъаз).
Хъасин дугъу
Насигьятнан
Гафар гъапну.
Аьхиримжи
Поход ву му
Ихь Пайгъамбрин
(Салават ва
Салам дугъаз) –
Ккуни лукlран
Сар Аллагьдин
Ва мусурман
Умматарин.
***
Табукдиан
Гъюрайиган,
Зун Авандиъ
Пайгъамбрихьна
(Салават ва
Салам дугъаз)
Гъюр Жабраил,
Ихь малайик.
Хьайи дугъахь
Аллагьдихьан
Вуй табшуругъ:
«Кубайиъ мист
Дабгъ кlури а,
Думу дивдар
Кьюб маш гъяйи
Агъдабнар ву».
Ихь Пайгъамбри
(Салават ва
Салам дугъаз)
Аьсгьябариз
Амур гъапlу
Цlа кипуз ва
Дабгъуз му мист.
Аьсгьябари
Гъапlний гьаци.
***
Мединайиз
Гъюр Пайгъамбар
(Салават ва
Салам дугъаз),
Му вахтари
Кечмиш шулу
Уммукусум -
Дугъан риш ва
Уьсмнан шив вуй.
Жаназайин
Дапlну гъудган,
Фаркьат гъапlу
Накьвдик думу.
Уьсмнахьинди
Илтlикlну кlур
Ихь Пайгъамбри
(Салават ва
Салам дугъаз):
- Эгер узуз
Айиш хъана
Швувахь хьадру
Шубурпи риш,
Думу увуз
Тувуйзавуз».
***
Ихь Пайгъамбри
(Салават ва
Салам дугъаз),
Абубакар
Кlулиъ ади,
Гьяждиз гъягъюз
Теклиф диву.
Зулькьайда ваз.
Пайгъамбрихьна
(Салават ва
Салам дугъаз)
Гьапlну сура
«Тавба апlуб».
Магьа дидин
Жикъи мяна:
«Гъюри айи
Йисхъантина
Бутпересар
Ва гъяцlлидар
Кябайилан
Илдицуз зат
Ихтияр дар».
