Баллы кабартмалар

Кирәк:

300 мл – сөт;

2 аш кашыгы – шикәр комы;

25 гр. – чүпрә;

3 данә – йомырка;

1 чәй кашыгы – тоз;

100 гр. – йомшарган сыер мае;

Он кирәгенчә.

Әзерләү ысулы:

300 мл җылымса сөткә 2 аш кашыгы шикәр комы, 25 гр чүпрә, 2-3 аш кашыгы он салып, башта чүпрәне күпертергә. Аннан 3 йомырка (берсенең сарысын кабартмаларның өстен майларга калдырырга), 1 чәй кашыгы тоз, 100 гр йомшак сыер мае, он белән йомшак камыр басырга. Камырны кабарырга куярга, бер күтәрелгәч басып төшерергә. Икенче күтәрелгәч, кечкенә шарчыклар алып, кул белән генә җәеп әченә кайнаган куертылган сөт (сгущенка) салырга һәм кабартмалар ясарга (эчлекне башка баллы нәрсәдән дә ясарга була).

Әзер кабартмаларны каплап тагын 20-30 минут кабартырга, йомырка сарысына 1 чәй кашыгы сөт кушып, өсләрен майларга. Өстенә берәр төрле татлы тәмләткеч сибәргә дә була. 170 градуста 30 минут пешереп алырга.

ЗӘМЗӘМИЯ СӘМИГУЛЛИНА