ТР Сәламәтлекне саклау министрлыгында мәетләрне яру мәсьәләсе буенча киңәшмә

ТР Сәламәтлекне саклау министрлыгында мәетләрне яру мәсьәләсе буенча киңәшмә

ТР Сәламәтлекне саклау министрлыгында Татарстан Мөфтие Камил хәзрәт Сәмигуллин һәм Министр Марсель Миңнуллинның эшлекле очрашуы узды.

Җыелыш ТР МДН үтенече белән оештырылды. Киңәшмә барышында мөфтият вәкилләре җаваплы затларга Татарстанда яшәүче мөселманнардан килеп ирешкән күпсанлы шикаятьләр хакында җиткерде. Ризасызлык шуннан гыйбарәт, олы яшьтә вафат булган мөселманнарның мәетләрен, аларның исән чакта ярдыруга каршы булуын һәм туганнарының да теләкләрен исәпкә алмыйча яру мәсьәләсе. Мөселманнар ислам кануннарында, үтерелү очракларыннан тыш, үлгән кешенең тәненә зыян китерергә ярамаганлыгын, шулай ук федераль законда аерым очракларда патологоанатом ярудан башка үлем турында медицина белешмәсе алу мөмкинлеге барлыгын исәптә тота.

Мөфти, Нәзарәтнең Аксакаллар шурасы рәисе һәм мәет җирләү хезмәте җитәкчесе министрлык һәм тикшерү идарәсе җитәкчелекләренә мәетләрне яру тәртибенә аныклык кертү буенча берничә тәкъдим белән чыкты. Министр һәм тикшерү идарәсенең беренче урынбасары аларны кертү мөмкинлеген карады һәм сорауларга җавап бирде. Шул ук вакытта алар федераль законнан чыгарга ярамаганлыгын ассызыклады һәм урыннарда, үлем турында медицина белешмәсен рәсмиләштергәндә, мәет ярудан баш тартырга теләгән кешеләргә аңлату эшенең канәгатьләндерерлек дәрәҗәдә булмавына игътибар итте. Җитәкчеләр бу бурычның җаваплы затлар алдында куелачагына ышандырды һәм халыктан килгән мөрәҗәгатьләрне аерым өйрәнергә кирәклеген әйтте. Моннан тыш, Министр, вафат булган кеше диспансеризация һәм табиб күзәтүен үткән очракта, аның мәетен ярудан баш тартуга рөхсәт бирү хакында мәсьәлә дә каралачак, дип ышандырды.