Чистайда V Мөхәммәд-Закир Камалов (Чистави) укулары узды

Чистай мөхтәсибәтендә танылган дин галименең тормыш юлын һәм мирасын өйрәнүгә багышланган V Республикакүләм фәнни-гамәли конференция – “Мөхәммәд-Закир Камалов (Чистави)” укулары узды.

Фәнни җыен күренекле дин әһелләре, яшь галимнәр, мөгаллимнәр һәм башка дәрәҗәле кунаклар катнашында узды. Укуларда катнашучылар арасында шулай ук танылган филологлар, әдәбият белгечләре, дин әһелләре, төбәк тарихын өйрәнүчеләр, укытучылар, педагоглар һәм җәмәгать эшлеклеләре булды. Әлеге чара Россиядә игълан ителгән Гаилә елы, Татарстан мөфтияте тарафыннан игълан ителгән Гаилә һәм хәләл яшәү рәвеше елы кысаларында үткәрелде.

Мөхәммәд-Закир Камалов укулары Чистай шәһәренең тарихи зиратында дога уку белән башланды. Биредә Татарстанның баш казые Җәлил хәзрәт Фазлыев, конференцияне оештыручыларның берсе, Ислам динен кабул итүгә 1000 ел исемендәге мәдрәсә (Казан шәһәре) җитәкчесе Ильяс хәзрәт Җиһаншин, Бөтендөнья татар конгрессының Казан бүлеге җитәкчесе Фәрит Мифтахов, Чистай районы имам-мөхтәсибе Мөхәммәт хәзрәт Кыямов, шулай ук район имамнары, шәһәр халкы, кунаклар катнашты.

Аннары чарада катнашучылар Чистай шәһәренең Ислам үзәгендә конференциянең пленар утырышында катнашты.

Конференциядә катнашучылар 2012нче елдан үткәрелә башлаган укуларда (конференцияләрдә) мөселман җәмәгатьчелегенең кызыксынуын билгеләп үтте һәм әлеге конференцияне дәвам итәргә карар кылды.