Апаста “Мирас” пансионаты ачылды
Апас муниципаль райо-нының Апас бистәсендә “Ярдәм-Помощь” иҗтимагый хәйрия фонды тарафыннан малайлар өчен “Мирас” пансионаты ачылды. Тантаналы ачылышта Татарстан Рәисе Рөстәм Миңнеханов; Апас муниципаль районы башлыгы Айрат Җиһаншин; Татарстан Мөфтиенең беренче урынбасары Илфар хәзрәт Хәсәнов; Татарстан Мөфтиенең социаль мәсьәләләр буенча киңәшчесе, “Ярдәм-Помощь” Гомуммилләт хәйрия фонды Советы рәисе Илдар Баязитов һәм башкалар катнашты.
Бу пансионатта бер үк вакытта 40 тәрбияләнүче һәм 4 тәрбияче өчен каралган, яшәү бушлай. Укыту программасы 4 елга исәпләнгән һәм 12 яшьтән 17 яшькә кадәрге балаларга юнәлдерелгән.
Белем бирү барышы татар халкының рухи һәм мәдәни мирасын, татар телен тирәнтен өйрәнүне, гарәп телен факультатив буларак өйрәнүне, шулай ук рухи тәрбия бирүне күздә тота. Тәрбияләнүчеләр гомуми белемне Апас урта гомуми белем бирү мәктәбе базасында алачак.
Рөстәм Миңнеханов тантанада катнашучыларны пансионат ачылу белән тәбрикләде һәм бинаны төзүдә катнашучыларга рәхмәт белдерде.
Пансионатны ачу тантанасында Татарстан Республикасы Мөфтиенең беренче урынбасары Илфар хәзрәт Хәсәнов кунакларны һәм дин кардәшләрне Татарстан Мөфтие Камил хәзрәт Сәмигуллин исеменнән сәламләде.
Аннары республика Рәисе һәм чакырылган кунаклар пансионатның төп бүлмәләрен карады. Бинада уку сыйныфлары, укытучылар кабинеты, тавыш яздыру студиясе, рекреацион зона, ашханә, остаханә, тәрбияләнүчеләр һәм тәрбиячеләр өчен йокы бүлмәләре, шулай ук кер юу һәм техник бүлмәләр бар.
