Татарстан мөхтәсибәтләренең җир тетрәүдә зыян күрүчеләргә ярдәме
Татарстан мөхтәсибәтләре Сүриядә һәм Төркиядә җир тетрәү фаҗигасе хәсрәтен бүлешеп, дин кардәшләргә ярдәмгә ашыкты. Республикабызның Буа, Лаеш, Чистай, Алабуга, Әлмәт кебек мөхтәсибәтләре, шулай ук “Ярдәм” хәйрия фонды зур күләмдә акчалата һәм кирәк-яраклар белән ярдәм җыю акцияләре оештырды.
Буа, Лаеш мөхтәсибәтләре район халкы һәм авыл мәхәлләләре гуманитар ярдәм җыйды. Җыелган акчага фаҗигадә зыян күрүчеләргә беренче чиратта кирәкле булган әйберләр (йокы капчыклары, термослар, җылыткычлар, подгузниклар, портатив телефон зарядкалары, балалар ризыгы һ.б.) сатып алынды.
Сүриядә һәм Төркиядә җир тетрәүдә зыян күрүчеләргә ярдәм оештыру хакында Чистай мөхтәсибәте дә игълан итте, шулай ук Алабуга мөхтәсибәте дә кушылды. Әлмәт мөхтәсибәте “Ансар” хәйрия фонды белән берлектә җир тетрәүдә зыян күрүчеләр өчен кирәк әйберләр җыя.
