Марат Әхмәтов татарча чыгыш ясау осталыгы буенча ярдәмлекләр тапшырды

Диния нәзарәтендә ТР Дәүләт Советы Рәисе урынбасары, ТР Президенты каршындагы Татар телен саклау һәм үстерү комиссиясе рәисе Марат Әхмәтов Татарстан Диния Нәзарәтенә мөфти белән очрашуга килде. Мөфтияткә ТР Президенты каршындагы Татар телен саклау һәм үстерү комиссиясе ярдәмендә нәшер ителгән “Татарча әлифба” һәм татар телендә сәнгатьле чыгыш ясарга өйрәтүче ярдәмлек китапларын, шулай ук саллы гына тиражда бастырылган милли-үзаң тәрбияләүгә юнәлтелгән эчтелекле плакатлар һәм истәлекле тамгалар тапшырды.

Шагыйрә Фәйрүзә Мөслимованың “Татарча әлифба” балалар өчен шигырь китабы исә мәчетләрдә яки имамны өйгә чакырып, балага исем куштырганда Исем кушу таныклыгы белән бергә тапшыру ниятеннән 5 мең данәдә чыгарылган. Марат Әхмәтов фикеренчә, бу бигрәк тә шәһәр балалары өчен кирәк. Әлифба әти-әниләргә истәлек булсын, алар туган телен онытмасын һәм гаиләдә беренче булып татар телен – ана телен өйрәтсеннәр, дигән максаттан чыгып бүләк ителәчәк.

Мәчетләрдә һәм мәчет тирәләрендә урнаштыру өчен шулай ук махсус плакатлар да булдырганнар. “Оныгың белән нинди телдә сөйләшәсең?” дип һәм Р.Фәйзуллинның “Нинди шатлык картлык көнеңдә – оныкларың сиңа рәхмәт әйтсә матур итеп туган телеңдә” сүзләре язылган плакатлар телне саклау һәм үстерү, халыкта милли үзаң тәрбияләү юнәлешендә хезмәт итәргә тиеш. Гомуми тиражы 4 мең булган әлеге плакатларны мәчет янындагы урыннарда һәм мәчетләрдә эләргә тәкъдим ителә.