Дагыстан мөфтияте Казанда халыклар бердәмлеге ифтары үткәрде

Дагыстан мөфтияте Казанда халыклар бердәмлеге ифтары үткәрде

Корстон-Казан залында Дагыстан Республикасы мөфтияте оештырган халыклар бердәмлеге ифтары узды. Дагыстан Республикасы мөфтие урынбасары Абдулла Сәлимов ифтарда катнашу өчен Казанга махсус килде. Әлеге чарада танылган нәшид башкаручы Гамзалав Гамзалов чыгыш ясады: ул кунакларны гарәп һәм рус телләрендәге чыгышлары белән сөендерде. Шулай ук балалар өчен викторина үткәрелде.

Ифтарда бер өстәл артына Татарстанның төрле шәһәрләреннән, шул исәптән Казан, Әлмәт, Чаллы һәм Алабугадан 800 кунак җыелды.

Мөфти Камил хәзрәт Сәмигуллин дагыстанлы дин кардәшләребезне бөтен Татарстан өммәте исеменнән изге Рамазан ае башлану белән котлады, изгелекләр һәм саваплы гамәлләр кылу турында вәгазь укыды, Россия мөселманнары рухи мирасы турында сөйләде.

Абдулла Сәлимов ифтарда катнашучыларны Дагыстан мөфтие, шәех Әхмәт Әфәнде исеменнән сәламләде һәм изге Рамазан ае белән котлау сүзләрен тапшырды, иминлек, изгелек һәм тынычлык теләде. Ул мөселманнарның бердәм булуының мөһимлеге турында сөйләде.

Чара барышында шулай ук «Ас-салам» газетасына язылучылар арасында гомрә юлламасына жирәбә салу оештырылды. Бу акция Казан шәһәре һәм Татарстан Республикасы халкы өчен «Ас-салам» газетасы ярдәме белән үткәрелде. Жирәбәдә катнашу өчен чара башланганчы газетага язылырга кирәк иде. Гомрәгә юлламаны Питрәч районы Шәле авылының “Заһир” мәчете имам-хатыйбы Тимур хәзрәт Латыйпов отты.