Мәчет каршындагы курслар мөгаллимнәренә сертификатлар тапшырылды
Россия ислам институтында мәчет каршындагы курслар мөгаллимнәре өчен оештырылган белем арттыру курсларын тәмамлаучыларга квалификация күтәрү турында таныклыклар һәм сертификатлар тапшырдылар. Әлеге курслар дүртенче тапкыр оештырылды.
РИИ һәм КИУ ректоры Рәфыйк Мөхәммәтшин мөгаллимнәргә мөселман яшьләрен укытуда авыр хезмәте һәм әлеге курсларда катнашулары өчен рәхмәт белдерде.
– Сез яшь буынга ислам нигезләрен өйрәтү һәм тәрбияләү буенча мөһим эш башкарасыз. Бу җаваплы хезмәтегез өчен без сезгә бик рәхмәтле. Шул ук вакытта сез белелмнәрегезне арттыруга да вакыт таба аласыз. Дәресләр сезнең өчен файдалы булгандыр дип ышанабыз, – диде ректор.
Белем арттыру курслары Россия ислам институты тарафыннан Ислам мәдәниятен, фәнен һәм мәгарифенә теләктәшлек фонды ярдәмендә оештырылды.
