Баш мөхәррир сүзе
Баш мөхәррир сүзе
Ислам дине һәрвакыт белем алуга, укуга омтылышны хуплый, галимнәргә, остазларга, мөгаллимнәргә тирән ихтирам, хөрмәт күрсәтә. Аллаһ Раббыбыз Коръәннең иң беренче иңгән аяте белән үк безне белем алырга чакыра: «Сине барлыкка китергән Раббың исеме белән укы!» – ди («Галәк» сүрәсе, 1 нче аять). Дин галимнәре аңлатуынча, «Укы!» дигән сүз белем алу дигәнне дә күз уңында тота. Мөгаен, ислам динендә белемгә, укуга зур игътибар бирелгәнлектән, нәкъ менә мөселман дөньясында остазлар, галимнәр генә түгел, төрле фәннәр үзләштерергә омтылган сабыйлар, үсмерләр, яшьләр – һәркайсы хөрмәт белән телгә алына.
Мөселман дөньясының бер өлеше булган татар халкы да гомер-гомергә белемгә, мәгърифәткә омтылып яши. Бүгенге көндә дә башка милләтләр татар халкының күп кенә шәхесләрен абруйлы остаз, мөгаллим буларак истә тота. Мәгърифәт нуры тарату – элек-электән халкыбызның иң күркәм сыйфатларының берсе булган. Мәкальләребезнең дә күпчелеге уку-белем алуга багышлануы юкка түгелдер: «Бәхетне юлдан эзләмә, белемнән эзлә», «Дөнья яктыра көн белән, адәм яктыра белем белән», «Укысаң белерсең, укымасаң бөләрсең»…
Хөрмәтле укучыларыбыз! Сезне чын күңелдән яңа уку елы башлану белән котлыйбыз. Алда сезне кызыклы ачышлар, файдалы белемнәр, зур җиңүләр көтсен! Сез өйрәнгән һәрнәрсә тормышыгызны тагын да мәгънәле итсен! Бу күркәм юлда безнең газетабыз сезнең өчен терәк, таяныч булыр дип ышанабыз.
