Чисталык - сәламәтлек
Ислам – чисталык дине. Аллаһның илчесе Мөхәммәд салляллаһу гәләйһиссәләм әйткән: “Чисталык иманның яртысы”.
Чисталык нәрсәдән башлана? Мөселман кешесе кайсы җирләрен, нәрсәләрне чиста тотарга тиеш?
Иң беренче чиратта, үзен (тәне, киеме, күңеле), өен,
йортын, авылын (шәһәрен), илен чиста тотарга тиеш.
“Иртә белән, уянгач та, иң беренче, илеңдә тәртип (чисталык) урнаштыр”/”Бәләкәй принц» Антуан де Сент-Экзюпери.
Сез ничек юынасыз?
Юына башлар өчен
Иң беренче ният кирәк
Аннан ни дибез? –
“Бисмилләәһ”
Инде безгә су бирегез.
Башта кулларны юабыз,
Уң кул, сул кул алмашлап,
Тәртип белән, чамалап.
Авыз, тамак богырдатып,
Танауны да чистартып,
Битләребезне өч кат
Югач, кулларыңа кайт.
Инде терсәккә кадәр
Юарга кирәк өчәр.
Чиста кулларың белән
Сыпыр башыңны тагын.
Колакларга да кереп чык,
Аякларны тубыкка тиклем
Юдын, инде корыт.
Син намазга әзер булдың!
Юыну тәртибе (таһәрәт):
Битләрне юу;
Кулларны терсәккә кадәр юу;
Башның дүрттән бер өлешен сыпыру;
Аякларны тубыкка тиклем юу.
Ислам динендә юыну – ул “Таһәрәт” алу дип атала. Таһәрәт – намазның ачкычы. Намаз укыр алдыннан таһәрәт алу фарыз булып тора.
Таһәрәт алу алдыннан “Бисмилләәһ”, дип әйтергә кирәк.
Юынып беткәч: «Әшһәдү ән-ләә иләәһә иллә Ллааһү, үә әшһәдү әннә Мүхәммәдән габедүһү үә расүүлүһ». (Аллаһтан башка илаһи зат юк һәм Мөхәммәд Аның колы һәм Илчесе булуына шәһадәт бирәм) дип дога кылу сөннәт гамәлләрдән санала. Моның өчен безгә Аллаһ әҗер-савабын бирә!
