Изгелекне иртәгә калдырма!

Изгелекне иртәгә калдырма!

Пәйгамбәребез галәйһиссәлам хәдисендә әйтелгән: "Бер кеше юлда аунап яткан чәнечкене күреп ала. Кешеләргә зыян салмасын, малларның аякларына кадалмасын дип, ул аны юлдан бер читкәрәк алып куя. Шушы гамәле өчен Аллаһы Тәгалә аның бөтен гөнаһларын гафу итә, Үз рәхмәте белән аны бүләкли".

Кешеләр бүгенге көндә өч төрле авыру белән авырыйлар. Беренчесе: "Бу миңа кагылмый", - дип уйлау. Икенчесе - ялкаулык. Иренгән кеше дөньяда да, ахирәттә дә бернәрсәгә дә ирешә алмый. Иренгәннәр иртәнге намазга да тормый, ураза да тотмый, Аллаһы Тәгаләнең рәхмәтен дә ала алмый. Ялкау кеше машинасын туктатып, юлда комаучаулаган әйберне дә алып куймый. Иренү - бик зур авыру. Ялкаулыкны җиңә алмасаң, дөньяда бернәрсә дә эшли алмыйсың. Ә өченче авыру - башкалар эшләр әле дип уйлау. Без үз йөрәгебезне әлеге авырулардан чистартырга тиешбез. Чисталыкка, пөхтәлеккә үз балаларыбызны, оныкларыбызны да өйрәтик. Алар да изгелек эшләргә кечкенәдән өйрәнеп үссеннәр. Юлыңда яткан пыяла синең аягыңны кисмәде ди, ләкин ул юлдан бит башкалар да уза. Бүген без битараф калсак, икенче көнне бу битарафлык үзебезгә кайтырга мөмкин.