Мәкле пирог

Камыры өчен кирәк:

(табаның диаметры – 20 см)

100 гр. – он;

30 гр. – шикәр комы;

50 гр. – сыер мае;

1-2 аш кашыгы бозлы су.

Эчлек өчен:

200 гр. – мәк;

250 мл. – сөт;

110 гр. – шикәр комы;

2 чәй кашыгы манный;

Сыек эчлек өчен:

200 гр. – 20%лы каймак;

150 гр. – эремчекле сыр;

1 данә йомырка;

70 гр. – шикәр комы;

1 чәй кашыгы ванилле шикәр комы;

50 гр. – он.

Әзерләү ысулы:

Кечкенә кәстрүлгә мәк, шикәр комы, манный һәм сөт салырга, уртача утка куеп куерганчы болгатып торырга. Аннан соң икенче савытка салып суытырга.

Камырын әзерләргә. Иләнгән онга шикәр комы салып бутарга, вак итеп турлалган салкын сыер маен өстәргә. Валчыклы булганчы ышкырга, аннары бозлы су салып камыр басырга. Камырны табага салып кул белән җәяргә.

Эремчекле сырны, каймакны, шикәр комын, йомырка, ванилле шикәр комын һәм онны бергә салып яхшылап болгатырга.

Камыр өстенә суынган мәк эчлеген салып кашык белән тигез итеп җәяргә һәм өстенә сыек эчлекне тигезләп салырга, соңыннан әзрәк мәк сибеп җибәрергә. 180 градуска кадәр җылытылган духовкада 30-35 минут пешерергә.

Пирог суынгач, кырыйларыннан үткен пычак белән әйләнеп чыгып табадан чыгарырга. Мәкле пирог әзер!