Бакы пәхләвәсе

Камыр өчен кирәк:

500 гр он

200 мл каймак

200 гр ак май

1 йомырка

1 чәй кашыгы камыр көпшәкләндергеч бер чеметем тоз.

Әзерләү ысулы: Бүлмә температурасында эретелгән майга каймак, йомырка салырга, яхшылап болгатырга. Онга камыр көпшәкләндергечне салып бутарга да, онны аз-азлап салып, камыр басарга. Әзер камырны 15-20 минут суыткычта ял иттерергә.

Камырны 6 яки 7 кисәккә бүләргә (җәйгәндә җиңел булсын өчен). Кунага бераз он сибеп, камырны бик юка итеп җәяргә (камыр никадәр юка булса, шуның кадәр әйбәт).

Иң астагы җәем зуррак булса, яхшырак. Һәрбер җәем арасына эчлекне салып өеп менәргә. Өстен йомырка белән майлап, үткен пычак белән ромбиклап кисәргә. Иң аскы җәемне кисмәскә тырышыгыз.

200 градус эсселектәге духовкада 15-20 минут пешереп алганнан соң, араларына эретелгән май салып, яңадан пәхләвә пешеп җиткәнче, духовкага озатырга. Өсте кызарып пешкәч, алырга да сироп салып куярга. 1-2 сәгатьтән пәхләвә әзер

Сироп өчен кирәк:

250 гр шикәр комы

200 мл су

2-3 аш кашыгы бал.

Суга шикәр комы салып, газга утыртырга. Шикәр комы эреп беткәнче болгатырга. Кайнап чыккач, уртача утта 5-7 минут тотарга (бик еш болгатмаска). Газдан алгач кына балны салып болгатырга.

Эчлек өчен кирәк:

2 стакан ярым әчтерхан чикләвеге

1 стакан шикәр комы

Әчтерхан чикләвеген ваклап (мин комбайнда ваклаттым, уклау белән дә ваклап була) шикәр комы белән кушырга.

Өстен майларга 1 йомырка

Арасына салырга 50 грамм эретелгән сыер мае кирәк булачак.

Чәйләрегез тәмле булсын!