ГАИЛӘ УЧАГЫНЫҢ ҖЫЛЫСЫ
ГАИЛӘ УЧАГЫНЫҢ ҖЫЛЫСЫ
Сер бирмичә дөнья барышына,
Карамыйча һава торышына,
Җыелышыйк гаилә җылысына,
Көч өстәргә гомер агышына.
Гаиләм, диеп типсен һәрбер йөрәк,
Гаилә – ныклы ышаныч һәм терәк.
Чын сөюнең тәмен татыр өчен,
Һәркемгә дә гаилә назы кирәк!
Дәвамына әдәп күчә килгән
Сабыр хатын-кыздан, гадел ирдән.
Өлкәннәргә урын бирсәк түрдән,
Гаилә булыр тату, булыр бердәм.
Кан-кардәшлек – түгел гади сәбәп,
Туганлыкны саклау – изге гадәт.
Күңелләрне күңелләргә бәйләп,
Гаилә учаклары торсын әйдәп.
Гаиләм, диеп типсен һәрбер йөрәк,
Гаилә – ныклы ышаныч һәм терәк.
Чын бәхетнең тәмен татыр өчен,
Һәркемгә дә үз гаиләсе кирәк!
Сания Әхмәтҗанова шигыре
