«Цурда хьунни»
Ряхра шинавусса Муслимлул нину даврия шардай дуркIун дур. Хъювун дуртсса арснал лисапитI гъаргъун душиву хIисав хьуну бур. Къатлул бухкIуллухун дуртун диркIун дур оьрчIал ца ус. Гамур чIалачIиний къадиркIун дур. Муслим ивкIун ур ччитул оьрчIащал тIуркIу тIий. Ганайсса гьухъагу махъа ххябувккун бивкIун бур.
Нину ялун дурххукун, оьрчI ццах куну лавай ивзун ур.
– Муслим, ина ча уклай уссияв, лисапитIран цивхьур? – цIувххуну бур ниттил.
– Дадай, къакIулли, цурда гъаргъунни! – дуллуну дур жаваб.
– Вил ца ус чIалай дакъархха, му чун дутав?
– Дадай, къакIулли, цурда дакъа хьунни! – куну бур Муслимлул.
– Яр гьухъа ххябуккан ци дуллай уссияв!?
– КъакIулли, дадай, цуппа ххялавгунни!
Чансса пикригу бувну ниттил увкуну бур:
– Ургу миннул оьккишиву! Гьарзад цирда зия хъанай дур. Миннун танмихI буван аьркинни.
– Цукун? – махIаттал хьуну ур оьрчI.
– Бигьанма! Цийнура цирда гъагъайсса, цирда дакъа шайсса, цирда ххядуккайсса гайннун цайнура цирда дакьин хьун лахьхьиннин бацIанну. ЛисапитI дакьин хьувча, гьухъа буруххувча, ус лякъувча. Жуварив ва кIанттай щябивкIун гайннух ялугьланну!
Му куццуй, куннах ку буруглай щябивкIун хьуну дур 10 минутI. Муслимлун кIулну бивкIун бур дадал увкумур цийнува цуппа къахьунтIишиву, амма мукIру хьун нигьа услай ивкIун ур. Ганан бувчIлай бивкIун бур лисапитI буттал дакьин дувантIишиву, гьухъа ниттил буруххантIишиву ва дакъа хьусса ус лякъин цанма гьан багьантIишиву. Цуксса начнугу, мукIру хьун аьркиншиву бувчIлай бивкIун бур.
– Дадай, на багъишла ити, лисапитI ссур дурну най унува, ца чарийн щуну гъаргъунни, навагу агьну гьухъа ххябувккунни, усгу урттувун лерххун ларгунни. На ххиишала лисапитI нигьачIийсса кIанттурдавух дачин къадулланна, - увкуну бур Муслимлул.
Ниттилгу оьрчI ххирагу увну, багъишла ивтшиву бувсун бур.
