ХIабибнал ﷺ дуниял кьадитаврил бусала
Ца хавар бусанда, вичIи дишара
Кьуръан-хIадис бувсун къабувчIайминнан,
Аьжам шеъри бувну ХIабиб ﷺ кIицI анда
Цал шафааьт жунма бияйрив ккаккан.
Муъжизатру буслай гъалгъа буварча,
КIивагу иттату макь экьи лагай,
Цув кIицI лагаврийну ихтилат барча,
Вай кьянкьасса дакIру кIукIлу хьун дачай.
Арулда лухччи-ссав цахлу лярхъусса,
Алжандул каширду цахьхьун дуллусса,
ХIурулэнтуралгу цах эшкьи хьусса,
Му ХIабибнал кьадирт пана дуниял
Жура кьадитаврил пана шайссарив!
ЦичIаврагу Заннал ляхъан даннин хьхьичI
Аьрширай цIа чирчу ХIабиб МухIаммад ﷺ.
Цалва Аллагьналгу ﷻ салават дуртсса,
Эшкьину ура тIий илчи гьан увсса.
Му ХIабибнал ﷺ кьадирт пана дуниял
Жура кьадитарча пана шайссарив!
Цув увччусса кьини дуньял цIан хьусса,
Гьарица лелуххи, гьарца жанавар
Гьарицагу кIанттай цив аьтун бивкIсса
Нач дакъа уххайсса та малакул мавт
Изну-пурман бакъа ялун къаувхсса.
РухI ласаврил чIарав уммат кIицI лавгсса
Му ХIабибнал ﷺ кьадирт пана дуниял
Жура кьадитаврил пана шайссарив!
Цува ивчIаннин хьхьичI цал вяъза бувсса
Минбарданин лавхъун равзалий авцIун
Мугьажиртал бувцун, ансартал бавтIун
Хъинну бикIи куну ца жуав дурсса.
Му ХIабибнал кьадирт пана дуниял
Жура кьадитаврил пана шайссарив!
Ххаришиву бусан Жабраил увкIун
Вин кIа Аьрш ва Алжан вин гьарив куну,
Ттун уммат кьабивтсса архшиву къачча,
На уммат бувччуний учча увкуну,
Му жуав дуллусса ХIабиб МухIаммад
Му ХIабибнал кьадирт пана дуниял
Жура кьадитарча пана шайссарив!
ХIасан-ХIусайндущал Бакьиърайн лавгун,
Лажин лувну агьну уммат чIа кусса,
Ххирашиву буслай Жабраил увкIри
Аьрщарава махлукь бизан буваннин
Ина ва вил уммат бизантIиссар тIий.
Му ХIабибнал кьадирт пана дуниял
Жура кьадитаврил пана шайссарив!
«Ва ля савфа» куну аят ливккукун,
Алжан винди куну цахьва бувсукун,
Ттул умматиндая ца адамина
Дуржагьраву ивтун рязи акъар тIий.
Му жуав дуллусса ХIабиб МухIаммад ﷺ
Му ХIабибнал кьадирт пана дуниял
Жура кьадитарча пана шайссарив!
Дужагьиравусса цалва умматрал
Аьмал бусича тIий цайнма бувкIукун,
Аьрширал лув лавгун сужда банссари
БакI гьаз да увкуну жуав данссари
"Ла илагьа илла Ллагь" увку вил уммат
Тархъанссари куну жаваб данссари,
Му ХIабибнал ﷺ кьадирт пана дуниял
Жура кьадитаврил пана шайссарив!
Тур кунма баилсса сиратIрал ламу
Мунилгу лулттусса кIирисса дужагь
Му ламул лув лавгун уммат чIа чинссар
Му ХIабибнал кьадирт пана дуниял
Жура кьадитаврил пана шайссарив!
Буракьращал архIал халъаьтру ларсун
Аллагьнал ﷻ расултал цачIан бувкIукун,
Гьаттал ялун бувкIун салам буллуну
Изу лавай куну цахьва увкукун,
Ттул уммат чуври тIий лавай изанссар
Му ХIабибнал кьадирт пана дуниял
Жура кьадитаврил пана шайссарив!
