Аьй лихханмур

Аьй лихханмур

ОьрчIру утту бишингу бувну, дада лавгун бур гайннахь бувккусса лугу лавсун.

МахIатталсса хIукумат дусса дур та Иордания! – пикри буллай бивкIун бур Аьшура. – Шагьрурдугу бур, варантту бусса къундалул чуллугу. ЯтIул хьхьирилгу аьжаившиву.

– Ина хIакьину вила мазрал хъирив бавцIурав? – цакуну цIувххуну бур Мусал цала ссихь.

– Агьа, цичIав оьккисса къаучин хIарачат буллай, гьарманащал яхшихашрай буссияв, – дакIнин бутлан бивкIун бур Аьшура.

– ХIарачат буллалу, – кьянкьасса чIуний увкуну бур Мусал, цува хъунама ушиву ккаккан буван ччай, – нагу хIакьину оьккисса цичIав къаучав.

– Бутта увкIунни! – ххари хьуну бур нузал чIу бавсса Аьшура.

Муса тIанк куну лавай ивзун, буттал хьхьичIун увккун ур:

– Ас-саламу аьлайкум, буттай! Цукун ура, увхрав даврий? ХIакьину ина жухь цукунсса хIадис буссанна?

– Вааьлайкум ас-салам, ххирами! Утту бихьияра, цIана на зухь буссанна ца хIадис, – жаваб дуллуну дур буттал пишгу куну. – ВичIи дишара. МухIаммад Идавсил ﷺ увкуссар: «Инава чув ухьурчагу, Аллагьная ﷻ нигьа увсун икIу. Оьккисса тIул хьурча, ганил хъирив хъинсса тIул дува, ххуймунил оьккимур лиххан даншиврул. Халкьуннангу так хъинсса хасият ккаккан дува».

ОьрчIру царпара хIаллай пикрирдавун лавгун пахъ багьну бур.

– Аллагьная ﷻ нигьа бусаву – му жухьва бува увкумур буллай, мабара укумур къабуллай бикIавурив? – цIувххуну бур Аьшурал.

– ТIайлассар, му Аллагьнайн ﷻ мютIи шавур! – тасттикь бувну бур буттал.

– Оьккисса тIул дувайхту ххуйсса дуллан циван аьркинссар? Мунил мяъна цир? – цIувххуну бур оьрчIал.

– ЦIана бувчIин банна. Пикри бувара, ца оьрчIал духIин дакъасса тIул дунни: щялмахъ бувсунни, нитти-буттал увкумур къабунни…

– Му учIиакъу ухьунссия!.. – ливчуну бур Мусаща.

– Бюхъайссар га ххуйсса оьрчI икIангу, бувагу хатIа къабайсса инсан къаикIайссархха. Гьарцаманаща личин бюхъайссар Аллагьнал ﷻ ва халкьуннал хьхьичI нач хьунсса тIул. Бусияра, цири бан аьркинсса га оьрчIал?

– ТIулдакъашивуртту къадуллай ивкIссания!.. – куну бур Аьшурал.

– Къадуван аьркина, бяст бакъар. Аммарив ганаща хьуну дур мукунсса тIул. Утти цири бантIисса? Ганан аьркинссар Аллагь ﷻ рязисса, хъинсса, халкьуннан мюнпатсса даву дуван. Гьарца хатIалул хъирив шайкун чIярусса хъинсса тIуллу дулларча, хъиннува хъинссар.

– Ягу бучIиссар цала зия дурмур дакьин дуван, – дакIнин багьну бур Мусан.

– Агьа, – хIала бувххун бур Аьшура, – дадан къаччан бикIан бувхьурча, багъишла бити учин, ци-дунугу пишкаш дан, къатлувусса кушурдаву кумаг бан.

– Дуснащал ххавххун ухьурча, бучIиссар цалчин инава лавгун дакьил хьун, хъинбала бан, – ххи бувну бур Мусал.

– Ди, тIайлассар, – рязи хьуну ур ппу. – Вищара тIулдакъашиву личирча, анаварну Аллагьнахь ﷻ багъишла итигу увкуну, цукунсса-бунугу хъинбала бува.

– Аллагьнан ﷻ къаччимур бувманал анаварну Аллагьнан ﷻ ххирамур бан аьркинну бур. Мукуннив? – цIувххуну бур Аьшурал.

– Ди. Жунма хIарачат бан аьркинссар оьрмулуву оьккисса тIуллаяр ххуйми ххишаласса дуллан.

– Га хIадисраву ялагу ци увкуну биякьай? – цIувххуну бур Мусал.

– Хасият так хъинсса ккаккан дува тIий бия, – дакIнин бувтун бур буттал.

– Му цукунни? – цIувххуну бур оьрчIал.

– Ххуйсса тIул-тIабиаьт – му инсаннавусса хъинсса хасият-рур: тIайлашиву, аьдлу бушиву, хъиншиву, рахIму-цIими бушиву, сситтучIа ссавур дуван кIулшиву, щялмахъ къабусаву, инсапшиву, ас-ламус ва нач-хIая душиву, иминшиву, хIалимшиву, хъуниминнаха ва нитти-буттаха хIурмат баву… Вай хасиятру чIяруссаксса инсангу ххуйссар.

– Ттул классраву ур ца мукунсса оьрчI. Ца кьини га къашавай хьуну дарсирайн къаувкIсса чIумал учительницалгума увкуна: «Та МухIаммад хъинну ххуйсса хасият дусса оьрчI ур, таная эбрат ласияра!» – бувсун бур Мусал.

– Туну ласарав эбрат? – пишгу куну цIувххуну бур буттал.

– Агьа, жу дусталлу. ЦачIу хъинсса давурттугу дувару.

– Хъинсса хасият дусса инсантал Аллагьнангу ﷻ, халкьуннангу ххирассар. Мукунсса инсаннащал ихтилат бан, даву дуван тIааьнссар. Ганайн чул бищун, вихшала дуван бучIиссар. Жула МухIаммад Идавс ﷺ ивкIссар дунияллий яла хъинма, ххуйсса хасият дума, ганал оьрмулиягу мисал ласун аьркинссар.

– Ттунгу ччива нава Аллагьнан ﷻ ххира хьуну, – увкуну бур Аьшурал.

– Ттунгу! – куну бур Мусал.

– ХIарачат буллали, ххира хьунтIиссару!