КканпIитIру
ЧIивисса Ххадижатлун 1-мур классраву дуклан хъинну гъира бивкIун бур. Цила учительница ва архIал дуклакисса оьрчIру ганин ххира хьуну бур. Амма ца багьана бивкIун бур душ школалийн гъира бакъа нанисса. Му багьана ивкIун ур Хадижатлущал ца парталух щяивкIсса Халид.
Гьарца кьини дарсирдая шаппай бучIайхту Хадижатлун цила портфельдануву кканпIитIрал чагъардал бакIу лякъайсса бивкIун бур. Душнин мяйжанну кIулну бивкIун бур гай Халидлул бичайшиву, цанчирча ганил цила парталул чIаххучу цимилагу увгьуну ивкIун ур му духIин дакъасса тIул дуллай. Хадижатлул ганай аьйгу дурну, миннат бувну бур ххишала мабичларда увкуну, амма оьрчI так хъян ивкIун ур. Гьунттимур кьинигу Хадижатлун портфельдануву чагъарду лякъуну бур.
Га кьини Хадижатлул бувсун бур дадахь цила классравусса оьрчIал дуллалисса тIуллая. Ниттил пишгу увкуну, душгу ххира бувну, ганил вичIилухун щурщу бувну бур.
Гьунттимур кьини Хадижат школданийн тяхъану бавчуну бур. Классравун буххайхту, гацIана цила парталух щябивкIун бур. ЧIал къавхьуну увкIун ур Халид. Цала портфель парталийнгу бувтун, занг бищуннин аьлахълан ливхъун ур.
Хадижатлул дирину цила портфельданува чагъарданул чантай буккан бувну, Халидлулмур рюкзакраву бивхьуну бур.
Бивщуну бур занг. Циняв оьрчIру классравун бувххун бур цала-цала кIанттурдай щябикIлан бивкIун бур. Халидгу цала луттирду ва тетрадру буккан буллан ивкIун ур. Микку ганал махIатталну буккан бувну бур чагъарданул чантай. Га бивкIун бур кканпIитIирттал бувцIуну.
– Ва… ва цир? – цIувххуну бур оьрчIал.
– Гьарцаманал цачIара думурди гаманангу дулайсса! – пишгу тIий увкуну бур Хадижатлул.
Халид ятIул ивчуну ур. Ганан гьарзад бувчIуну, хъинну нач хьуну дур.
