Лелуххул эбрат

Щейх Ибрагьим Адгьам ивкIссар Шакьикь Балхил усттазну. Ца кьини Шакикь цала щейхначIан увкIун, бувсун бур цува хIалтIилухун ачин хIадур хъанай ушиву.

– Жува хьунабакьиннин цаппара барзру гьантIиссар! – увкуну бур ганал.

Амма кIива-шанма гьантлува Ибрагьим Адгьамлун ккавккун ур Шакьикь шагьрулувух най.

– Ина ттигу къалавграв? – цIувххуну бур щейхнал.

Балхил бувсун бур:

– На ссапарданийн увкссияв, амма ца аьжаивсса иш ккавккун зана ивкIра. Ххуллий на игьалаган авцIуссияв цучIав акъасса кIанай. Гикку щяивкIсса чIумал ттун ккавккуна лихха-ххичча хьусса, аьрччасса чIелму. Ттун ганий хъинну цIими хьуна. На цIуххав ттухьва нава: «Ва чIелму цукун хъин хьунавав, сагъну личIанавав?»

Мукун пикрирдай унува гиккун левххун цамур чIелму бувкIун, цила къеппул дургьусса дукия къашаваймунил хьхьичIун дирчуна. Ганил дуркуна цинна дирчумур. Микку на хъинну махIаттал хьура.

Ттухьва нава учав: «АльхIам-дулиллагь! Щукру Аллагьнайн! Укун ливчIсса лелуххунгума кьисмат биян бувайсса Заннал ттуннив къабулунтIисса?» Микку ттун пикри махъунай зана икIан, дузал хьунмуних луглай шагьрулия шагьрулийн занансса кьас кьадиртун.

Шакьикьлул бувсмуних вичIигу дирхьуну, Ибрагьим Адгьамлул увкуну бур: «Ттул арс! Ина аьрччасса, гъаривсса чIемуллуха лавхьхьуну икIан ччай ура. Ганин дуканмур ларсун бувкIмуния эбрат циван къаласав? Вища хьунссия вила канил захIмат буллай цайминнангу кумаг буллан.

Усттазнал маслихIат бавсса Шакьикьлул щейхнахь барчаллагьгу увкуну, цала ярунная пардав дагьшиврий мукIру хьуну ур.